ئەنەس جەمال: لیستی پارتی لە کەرکووک، لیستی پێکهاتەکانە

ئەنەس جەمال
ئەنەس جەمال

K24-هەولێر:

کاندیدێکی نەتەوەی تورکمانیی پارتی دیموکراتی کوردستان لە کەرکووک ئاماژە بەوە دەکات، لیستی پارتی لە کەرکووک، بۆتە لیستی تەواوی پێکهاتەکانی کەرکووک، دەشڵێ: تورکمان و عەرەب و کورد نەخشەی ئیداریی کەرکووک دەگۆڕن.

ئەمڕۆ دووشەممە ( 11 ی کانوونی یەکەمی 2023)، ئەنەس جەمال محەمەد کاندیدی ژمارە 19 ی پارتی دیموکراتی کوردستان بە لیستی197 لە شاری کەرکووک  بە کوردستان24 ی راگەیاند: پارتی بە 30  کاندید بەشداری هەڵبژاردنی ئەنجوومەنی پارێزگاکان دەکات لە شاری کەرکووک.

ئەنەس جەمال گوتی: ئامانجمانە زۆرترین دەنگ لە هەڵبژاردن بەدەست بێنین لەپێناو ئەوەی بتوانین خزمەتێکی باشی خەڵکی کەرکووک بکەین بەبێ جیاوازی.

ئەو کاندیدەی پارتی ئاماژەی بەوە کرد، پەیوەندی زۆر باشیان لەگەڵ عەرەب و تورکمان هەیە، گوتیشی: زۆربەی تورکمانەکان بەڵێنیان داوە دەنگ بە پارتی دیموکراتی کوردستان بە منی بدەن.

لەبارەی ئەو پلان و بەرنامانەی کە هەیانە بۆ شاری کەرکووک لەدوای هەڵبژاردن، ئەنس جەمالی کاندیدی پارتی دیموکراتی کوردستان تیشکی خستە سەر ئەوەی، نیازیان هەیە دوای دەرچوون و سەرکەوتنیان لە هەڵبژاردن، خزمەتی هەمووان بکەن بەبێ جیاوازی، بەوانەی دەنگیان پێدەدەن و ئەوەی دەنگیشیان پێنادات، گوتی: دروشمی پارتی پێکەوە ژیان و یەکتر قبوڵکردنە.

لەبارەی کێشە و زەوی و زاری کەرکووک و دەوروبەری، ئەنەس جەمال ئاماژەی بەوە کرد، کێشەی زەوی و زاری کورد و تورکمان لە ناوچەی سەرگەڕان و پەلکانە و بیبانی و، داقوق و شوانە، قەرە هەنجیر دەکەنە بابەتی سەرەکی وەکو پارێزەر، دەڵێ: مافی هەموو ئەوانەیە لە کورد و تورکمان کە زەویان بە بڕیاری ئەنجوومەنی سەرکردایەتی شۆڕش و بڕیارەکانی کاروباری باکوور درابوو بە عەرەب، زەویەکانیان پێ بدرێتەوە، دەشڵێ: ئەو بڕیارانەی ئێستا دەردەچێ تایبەت بەو زەویانە، بڕیاری سیاسین نەوەک یاسایی، ئەگەر یاسایی بێت، ناکرێ ئەو زەویانە بە عەرەب بدرێت، پێویستە بە کورد و تورکمانەکان بدرێتەوە.

ئەنەس جەمال ئاشکرای دەکات، بە گەڕانەوەی پارتی دیموکراتی کوردستان بۆ کەرکووک، دۆخی شارەکە زۆر باشبووە، کوردەکان و تەواوی پێکهاتەکان پێێ دڵخۆشن، دەشڵێ: تورکمان لەسەر لیستی پارتی سێ بەربژێری هەیە لەگەڵ بەربژێری عەرەبیش، ئاماژەی بەوە کرد،لیستی پارتی دیموکراتی کوردستان، لیستی پێکهاتەکانی کەرکووکە بە کورد و عەرەب و تورکمان.

کارزان حەیدەر