وەزارەتی ئاوەدانکردنەوە و کاروباری کۆمەڵایەتی بڕیارێك لە بەرژەوەندی خاوەن پێداویستییە تایبەتەکان دەردەکەن
K24 – هەولێر:
وەزیری ئاوەدانکردنەوە و نیشتەجێکردن و وەزیری کار و کاروباری کۆمەڵایەتی حکومەتی هەرێمی کوردستان یاداشتێکی هاوبەشیان واژۆکرد و بڕیارێکیان لە بەرژەوەندی خاوەن پێداویستییە تایبەتەکان دەرکرد.
ئەمڕۆ دووشەممە (11ـی کانوونی یەکەمی 2023) دانا عەبدولکەریم، وەزیری ئاوەدانکردنەوە و نیشتەجێکردن لە دیوانی وەزارەت پێشوازی لە کوێستان محەممەد، وەزیری کارو کاروباری کۆمەڵایەتی کرد و یاداشتێکی هاوبەشیان واژۆکرد.
لەدیداری نێوانیاندا گفتوگۆیانکرد لەسەر هەماهەنگی و کاری پێکەوەیی نێوان هەردوو وەزارەت، هەروەها گفتوگۆیانکرد دەربارەی تەرخانکردنی ژمارەیەک یەکەی نیشتەجێبون بۆ خاوەن پێداویستییە تایبەتەکان، کە ئەو یەکانە لەلایەن وەزارەتی ئاوەدانکردنەوە و نیشتەجێکردنەوە دروست دەکرێن.
دواتر لە رێورەسمێکدا وەزیری ئاوەدانکردنەوە و نیشتەجێکردن و وەزیری کار و کاروباری کۆمەڵایەتی یاداشتێکی ھاوبەشیان واژۆکرد و تیایدا بڕیاردرا لەسەر؛ دیاریکردنی رێژەی 3% لەو یەکانە بۆ خاوەن پێداویستییە تایبەتەکان.
رۆژی (8ـی ئابی 2023) دانا عەبدولکەریم، وەزیری ئاوەدانکردنەوەو نیشتەجێکردن لە رێوەرەسمێکدا پرۆسەی دابەشکردنی فۆرمی یەکەی نیشتەجێبون و کاراکردنی فۆرمەکەی بەشێوەی ئۆنلاین بۆ هاووڵاتییانی کەمدەرامەت راگەیاند.
یەکەکان زیاتر لە نۆ هەزار یەکەی نیشتەجێبونە و لەچوارچێوەی یاسای نیشتەجێبوندا دروستکراون، کە بەشێکیان تەواوبوون و بەشێکیان کارکردن تیایاندا بەردەوامە.