رۆمانۆوسكی پیرۆزبایی له گه‌ل و حكومه‌تی عێراق ده‌كات
K24 – هەولێر:
باڵیۆزی ئه‌مه‌ریكا له عێراق ده‌ڵێت، به‌هۆی به‌ڕێوه‌چوونی هه‌ڵبژاردنێكی سه‌قامگیر و ئاشتییانه، پیرۆزبایی له گه‌ل و حكومه‌تی عێراق ده‌كه‌م. هه‌روه‌ها گوتیشی، به‌ڕێوه‌چوونی هه‌ڵبژاردنێكی ئازاد و پاك، بۆ كۆمه‌ڵگه دیموكراته‌كان كه به‌هۆیه‌وه داهاتووی خۆیان دیاری ده‌كه‌ن، گرنگه.
ئه‌لینا رۆمانۆوسكی باڵیۆزی ئه‌مه‌ریكا له عێراق، له رێگه‌ی تۆڕی كۆمه‌ڵایه‌تی ئێكس (تویته‌ری پێشوو) ئه‌مڕۆ (سێشه‌ممه 19ـی كانوونی یه‌كه‌می 2023) نووسیوویه‌تی: به‌هۆی به‌ڕێوه‌چوونی هه‌ڵبژاردنێكی سه‌قامگیر و ئاشتییانه، پیرۆزبایی له گه‌ل و حكومه‌تی عێراق ده‌كه‌م.
هه‌روه‌ها باڵیۆزی ئه‌مه‌ریكا له عێراق ده‌ڵێت: "ئه‌نجامدانی هه‌ڵبژاردنێكی پاك و سه‌قامگیر بۆ كۆمه‌ڵگه دیموكراته‌كان له پێناو دیاریكردنی داهاتووی، گرنگ و پێویسته".
رۆمانۆوسكی هه‌روه‌ها ده‌ڵێت: "تاووتوێی كاركردن له‌گه‌ڵ به‌ربژێره هه‌ڵبژێردراوه‌كانی نێو ئه‌نجوومه‌نی پارێزگاكان ده‌كه‌ین".
رۆژی شەممە (16ـی کانوونی یەکەمی 2023) پرۆسەی دەنگدانی تایبەت بۆ هێزە چەکدارەکان و دەزگا ئەمنییەکان و ئاوارەکان بۆ هه‌ڵبژاردنی ئه‌نجوومه‌نی پارێزگاكان بەڕێوەچوو، کە ملیۆنێک و 50 هەزار و 653 کەس مافی دەنگدانیان هەبوو و 600 بنکەی دەنگدانیان بۆ ئامادەکرابوو کە دوو هەزار و 477 وێستگەی دەنگدان لەخۆدەگرێت.
دوێنێ دووشەممە (18ـی کانوونی یەکەمی 2023) كاتژمێر حه‌وتی به‌یانی پرۆسەی دەنگدانی گشتی بۆ هەڵبژاردنی ئەنجوومەنی پارێزگاکانی عێراق بەڕێوەچوو و کورد لە پارێزگاکانی کەرکووک، نەینەوا، دیالە، سەڵاحەددین و بەغدا بەشدارە و 15 ملیۆن و 150 هەزار دەنگدەر مافی ده‌نگدانی هه‌بوو.
نبارك للشعب العراقي و @IraqiGovt على اجراء عملية انتخابية آمنة وسلمية ومأمنة. تعد الانتخابات الحرة والنزيهة ضرورية للمجتمع الديمقراطي لتحديد مستقبله، وتسلط انتخابات مجالس المحافظات لهذا الأسبوع الضوء على التزام العراقيين بالديمقراطية. ونتطلع إلى العمل مع القادة المحليين المنتخبين…
— Ambassador Alina L. Romanowski (@USAmbIraq) December 19, 2023