ئۆپۆزیسیۆنی تورکیا: ئامانجی ئۆپەراسیۆنەکانی دژی پەکەکە 'روون نییە'

دوو سەربازی سوپای تورکیا
دوو سەربازی سوپای تورکیا

K24 - هەولێر

ئۆپەراسیۆنەکانی ئەم دواییەی سوپای تورکیا لە دژی پەکەکە لە ناوخۆی ئەو وڵاتەدا رەخنەی زۆری بەدوای خۆیدا هێناوە. ئۆپۆزیسیۆن رەخنەی لە حکومەت هەیە و ئاماژە بەوە دەدات، ئامانجی ئۆپەراسیۆنەکان روون نییە.

جارێکی دیکە پێکدادانەکانی نێوان سوپای تورکیا و چەکدارانی پەکەکە لە سنووری هەرێمی کوردستان و رۆژئاوای کوردستان توند بوونەتەوە و لە ماوەی مانگێکدا دەیان سەرباز و چەکداری پەکەکە کوژراون.

تونجەر باکرهان، هاوسەرۆکی پارتی یەکسانی و دیموکراسی گەلان (دەم پارتی) لە کۆبوونەوەیەکی جەماوەریدا پرسە و سەرەخۆشی خۆی ئاراستەی خانەوادەی سەربازان کرد و هیوای خواست "ئەم خوێنە" بوەستێندرێت.

تونجەر باکرهان گوتیشی، "شەڕ هەمیشە ئازاری بەدوای خۆی هێناوە و کورد لە هەموو لایەک زیاتر ئاشنای ئازارەکانی شەڕ و کوشتارە. هەندێک لایەن دروشمی شەڕ بەرزدەکەنەوە، چونکە لە بنەڕەتدا لە ئازاری شەڕ ناگەن".

هاوکات تولای هاتیمئۆغوڵڵاری، هاوسەرۆکی پارتی یەکسانی و  دیموکراسی گەلان (دەم پارتی) رایگەیاند، "پێویستە شەڕ رابگیرێت و ناکرێت رۆڵەی خەڵکی هەژار لە پێناو پاراستنی دەسەڵاتی کەسانێک، بەکوشتن بدرێن". گوتیشی، "باشترین شت بۆ ڕاگرتنی شەڕ؛ دانوستان و فەراهەمکردنی ئاشتەواییەکی سەربەرزانەیە و ئەمەشیان تاکە چارەسەرە".  

ئۆپەراسیۆنی چڕنوک قوفڵ لە 18ـی نیسانی ساڵی 2022 دەستیپێکردووە. حکومەتی تورکیا لە رۆژی دەستپێکردنی ئەم ئۆپەراسیۆنەوە رەخنەی لێدەگیرێت بەوەی زانیارییەکان لەبارەی ئۆپەراسیۆنەکە روون نین.

جارێکی دیکە ئۆزگور ئۆزەل، سەرۆکی پارتی گەلی کۆماری (جەهەپە) لە کۆنفرانسێکی رۆژنامەوانیدا رەخنەی لە هەڵوێستی حکومەت گرت و رایگەیاند، ئامانجی ئۆپەراسیۆنی چڕنوک قوفڵ دیار نییە.

ئۆزگور ئۆزەل  گوتی: "لەومەو بەدوا بێدەنگ نابین، ئەم گەلەش بێدەنگ نابێت. هەر کاتێک بێدەنگ دەبین، ژمارەی شەهیدەکانمان زیاتر دەبن. بەرپرسیارییەتی هەموو شەهیدەکانمان لە ملی ئەو کەسانە دایە کە تا ئێستا هۆکاری دەستپێکردنی ئۆپەراسیۆنی چڕنوک قوفڵیان روونیان نەکردووەتەوە و ئامانجیان دیار نییە؛ ئیدی بەسە".

هەر کاتێک باسی چارەسەرکردنی کێشەی کورد بکرێت و هەڵبژاردن نزیک ببێتەوە، شەڕ و پێکدادانەکان توندتر دەبنەوە. کۆتاییهێنان بە قۆناغی ئاشتی لە تورکیا و دەستپێکردنەوەی ئۆپەراسیۆنە سەربازییەکانی ساڵی 2015 نموونەیەکی دیاری ئەم هاوکێشەیەن.