نه‌وزاد باجگر: دامه‌زراندنی كوردیش هاوس له داڤۆس هه‌نگاوێكی ئومێدبه‌خشه بۆ ئایینده‌ی ئابووری هه‌رێمی كوردستان
K24-هەولێر:
بازرگانێكی هه‌رێمی كوردستان ئاماژه به‌وه ده‌كات، به‌شداریكردنی سه‌رۆكوه‌زیرانی هه‌رێمی كوردستان كه ئه‌ندازیاری پێشكه‌وتنی ئابووری هه‌رێمه، گرنگی هه‌یه بۆ راكێشانی سه‌رنجی جیهان بۆ هه‌رێمی كوردستان. ده‌شڵێت، دامه‌زراندنی (كوردیش هاوس) له داڤۆس هه‌نگاوێكی ئومێدبه‌خشه بۆ ئایینده‌ی هه‌رێمی كوردستان.
ئه‌مڕۆ (دووشه‌ممه 15ـی كانوونی دووه‌می 2024) نه‌وزاد باجگر، بازرگانی هه‌رێمی كوردستان تایبه‌ت به كوردستان24 رایگه‌یاند، دامه‌زراندنی (كوردیش هاوس) له داڤۆس هه‌نگاوێكی ئومێدبه‌خشه بۆ ئایینده‌ی هه‌رێمی كوردستان به‌تایبه‌ت له رووی دروستكردن و بونیاتنانی پردێكی ئابووری له‌گه‌ڵ دنیای ده‌ره‌وه.
باجگر ئاماژه‌ی به‌وه‌ش كرد، ئامانجیان له به‌شداریكردن له داڤۆس بۆ ئه‌وه‌یه په‌یوه‌ندی نوێ له‌گه‌ڵ سه‌ركرده و كۆمپانیا گه‌وره‌كانی جیهان دروست بكه‌ن و به‌قازانجی هه‌رێمی كوردستان بشكێته‌وه.
ناوبراو باسی له‌وه‌ش كرد، مه‌به‌ستیانه له‌و كۆڕبه‌نده‌دا سه‌رنجی جیهان بۆ هه‌رێمی كوردستان رابكشێن كه هه‌رێمێكی گرنگی سیاسی و ئابوورییه له ناوچه‌ی رۆژهه‌ڵاتی ناوه‌ڕاست.
ئه‌و بازرگانه روونیشیكرده‌وه، سه‌رۆكوه‌زیران مه‌سرور بارزانی كه به‌شداری له كۆڕبه‌نده‌دا كردووه، ئه‌ندازیاری ئابووری هه‌رێمی كوردستان و پێشكه‌وتنه ئابوورییه‌كانیه‌تی. گوتیشی، داڤۆس ده‌رفه‌تێكه بۆ زیاتر ناساندنی هه‌رێمی كوردستان به دنیای ده‌ره‌وه، به‌تایبه‌تی كه كابینه‌ی نۆیه‌می حكومه‌تی هه‌رێمی كوردستان سه‌باره‌ت به پرسه ئابوورییه‌كان بایه‌خێكی زیاتری هه‌یه.
ئەمڕۆ دووشەممە، 15-01-2024، مەسرور بارزانی، سەرۆکی حکومەتی هەرێمی کوردستان بە سەرۆکایەتیی شاندێک بۆ بەشداریکردن لە کۆڕبەندی ئابووری جیهانی لە داڤۆس؛ بەرەو سویسرا بەڕێکەوت.
حکومەتی هەرێمی کوردستان لە راگەیەندراوێکدا ئاماژەی بەوە کردووە، مەسرور بارزانی لە پەراوێزی بەشداریکردنی لە کۆڕبەندی ئابووری جیهانیی داڤۆس، لەگەڵ ژمارەیەک لە سەرۆک و سەرۆک وەزیران و بەرپرسانی باڵای وڵاتانی رۆژهەڵاتی ناوەڕاست و ئەوروپا و جیهان کۆدەبێتەوە و لە دیدارەکانیدا، چەندین تەوەر و پرسی ناوخۆیی و هەرێمی و جیهانی تاوتوێ دەکات، لەوانەش پەرەپێدانی پەیوەندیی دوولایەنە بەتایبەتی لە بوارەکانی ئابووری و وەبەرهێناندا.
ئاماژە بەوەش کراوە، بڕیارە سەرۆکوەزیرانی هەرێمی کوردستان لە پانێلێکی کۆڕبەندەکەشدا بەشدار بێت، کە تایبەتە بە ململانێ و ناکۆکییەکانی رۆژهەڵاتی ناوەڕاست.
لە راگەیەندراوەکەدا هاتووە: "بەشداریی سەرۆکی حکومەت لە کۆڕبەندی داڤۆس، لە چوارچێوەی هەوڵە بەردەوامەکانیدایە بۆ پتەوکردنی پەیوەندییەکانی هەرێمی کوردستان لەگەڵ وڵاتان و تاوتوێکردنی ئەو پرسانەی کە پەیوەندییان بە ئایندەی عێراق و ناوچەکە بە گشتی هەیە".
شاندی هەرێمی كوردستان لە ژمارەیەک لە بەرپرسانی حکومی و وەبەرهێنەر و خاوەنکارانی کوردستان پێکهاتووە کە یەکەمجارە بەشداری لە داڤۆس دەکەن. هەروەها بە دەستپێشخەری و راسپاردەی سەرۆکوەزیران، ماڵی کوردستان لە داڤۆس دەکرێتەوە.
کۆڕبەندی داڤۆس 2024، ئەمڕۆ دووشەممە بە درووشمی" بنیاتنانەوەی متمانە" دەستیپێکرد و تا رۆژی هەیینی، 19-01-2024، بەردەوام دەبێت. کۆڕبەندی ئەمساڵ پێشوازی دەکات لە 100 سەرۆک حکومەت و زۆربەی دەزگا و رێکخراوە نێودەوڵەتییەکان و هەزار هاوبەشی کۆڕبەندەکە و سەرکردە کۆمەڵایەتییەکان. هەروەها شارەزایان و نوێنەرانی گەنجان، کارسازان و میدیاکانیش ئامادە دەبن.