تاران: سعوودییە ھۆكاری شكستی گفتووگۆكانی یەمەنە
K24 – هه‌ولێر:
حوسێن ئەمیر عەبدوڵڵاهیان راوێژكاری تایبەتی سەرۆكی پەرلەمانی ئێران بۆ پرسی سیاسەتی دەرەوە بە فارس نیوزی راگەیاند، ریاز ھۆكاری سەرەكی شكستی گفتووگۆكانی چارەسەری قەیرانی یەمەن و كوژرانی ھاووڵاتییانە.
عەبدوڵڵاهیان سعوودییەى تۆمەتبار كرد بەوەی سیاسەتی پەرەدانی شەڕی ناوخۆی یەمەن پەیڕەو دەكات.
گوتیشی: سعوودییە رێگە نادات نەتەوە یەكگرتووەكان بەرپرسیارێتییەکانی خۆی سەبارەت بە خەڵكی یەمەن ئەنجامبدات.
بە وتەی عەبدوڵڵاهیان ئەمریكا لە بەرامبەر سیاسەتەكانی سعوودییە بێدەنگە و ئەنجامەكەشی ناسەقامگیری و تێكدانی ئاسایشی ناوچەکەیە.
ریاز بە بەردەوامی تاران بە پشتیوانی لە حوسییەكان و دەستێوەردان لە كاروباری یەمەن تۆمەتبار دەكات و لەبەرامبەریشدا ئێران، سعوودییە بە ھۆكاری كوشتنی ھاووڵاتییانی یەمەن دەزانێت.