لەبارەی تەندروستی ئەندامانی خێزانی پێشڕەو دزەیی روونکردنەوە دەدرێت

دیمەنێکی ماڵی پێشڕەو دزەیی لە 15ی کانوونی دووەمی 2024 لەلایەن ئێران کرایە ئامانج
دیمەنێکی ماڵی پێشڕەو دزەیی لە 15ی کانوونی دووەمی 2024 لەلایەن ئێران کرایە ئامانج

K24 – هەولێر

وەزیری تەندروستی حکومەتی هەرێمی کوردستان، لە روونکردنەوەیەکدا ئاشکرای دەکات کە باری تەندروستی ئەندامانی خێزانی پێشڕەو دزەیی بەرەو باشتر دەچێت.

سامان بەرزنجی وەزیری تەندروستی حکومەتی هەرێمی کوردستان لە روونکردنەوەیەکدا دەڵێت: "ئەوەی لە ماوەی چەند کاتژمێرێکی یەکەمی رووداوی هێرشی تیرۆرستی بۆ، سەر ماڵی خوالێخۆشبوو (پێشڕەو دزەیی) کرا رزگارکردنی ژیانی برینداران بوو، بەتایبەتی باری زۆر ترسناک و ناجێگیری هەردوو کوڕەکەی و خێزانی خوالێخۆشبوو، کارێکی گەورە و لە رادەبەدەر بوو، بەتایبەتی کوڕی گەورەی (رۆژ پێشڕەو دزەیی) کە باری تەندروستی یەکجار خراپ بوو بەهۆی سەختی برینەکانی جەستە و تەواوی خوێنبەربوون، خۆشبەختانە ژیانی تا ئێستا رزگار کراوە و لەژێر چاودێری چڕی پزیشکی دایە".

وەزیری تەندروستی دەڵێت: "لە دوو رۆژی رابردوودا هیچ نەشتەرگەریەکی بۆ نەکراوە و ئەو هەواڵانەش رەتدەکەینەوە گوایە کوڕی بچووکی گیانی لەدەستداوە. لە ئێستادا باری تەندروستی روان و هانای خێزانی باشە".