عێراق پێشوازی لە بڕیاری دادگای دادی نێودەوڵەتی بۆ رێگری لە کۆمەڵکوژی فەڵەستینییەکان دەکات
K24 – هەولێر:
وەزارەتی دەرەوەی عێراق پێشوازی لە بڕیاری دادگای دادی نێودەوڵەتی بۆ وەستاندنی کۆمەڵکوژی فەڵەستینییەکان دەکات.
ئەمڕۆ هەینی (26ـی کانوونی دووەمی 2024) وەزارەتی دەرەوەی عێراق لە میانەی راگەیاندراوێکدا رایگەیاند، پێشوازی لەو بڕیارەی دادگای دادی نێودەوڵەتی بۆ وەستاندنی کۆمەڵکوژی فەڵەستینییەکان دەکەین، کە چەندین مانگە ئیسرائیل پیشێلی یاسا نێودەوڵەتییەکانی کردووە.
وەزارەتی دەرەوەی عێراق گرنگی راگرتنی ئۆپەراسیۆنە سەربازییەکانی سوپای ئیسرائیل بۆ سەر خەڵکی غەززە دووپاتدەکاتەوە. ئاماژەی بەوەشدا، ئەو ئۆپەراسیۆنانە رێگربوون لە هاتنە ناوەوەی یارمەتییە مرۆییەکان بۆ خەڵکی غەززە.
هەروەها وەزارەتەکە پیزانینی خۆی بۆ هەڵوێست و هەوڵەکانی باشووری ئەفریقا و تیمی یاسایی خۆی لە پەسەندکردنی دۆسیەی تۆمارکردنی داوای یاسایی لە دژی بەردەوامی پێشێلکارییەکانی ئیسرائیل لە بەردەم دادگای نێودەوڵەتی دەردەبڕێت.
رۆژی هەینی (26ـی کانوونی دووەمی 2024) جۆون دانەهیو، سەرۆکی دادگای دادی نێودەوڵەتی رایگەیاند:" دەبێت دەوڵەتی ئیسرائیل رێکاری پێویست بۆ رێگریکردن و سزادانی هاندەرەکان بۆ جینۆسایدکردنی فەڵەستینییەکان لە کەرتی غەززە بگرێتەبەر، 16 دەنگ بەرانبەر بە دەنگێک، پێویستە ئیسرائیل رێکاری دەستبەجێ و کاریگەر بۆ گەرەنتیکردنی دابینکردنی خزمەتگوزاری و پێداویستی مرۆیی بگرێتەبەر، تا دۆخی خراپی ژیانی فەڵەستینییەکانی کەرتی غەززە چارەسەر بکات".
رۆژی هەینی (26ـی کانوونی دووەمی 2024) لەدانیشتنێکی کراوەدا، دادگای دادی نێودەوڵەتی کە بارەگەکەی لە لاهای هۆڵندایە، بڕیاری خۆی سەبارەت بە سکاڵاکەی باشووری ئەفریقا دژی ئیسرائیل، لەبارەی تێوەگلانی لە جینۆساید و تاوانی دژی مرۆڤایەتی دەرکرد.