بەرێوەبەری وەبەرهێنانی دهۆک: لەکابینەی نۆیەمدا مۆڵەتمان بە 80 پڕۆژەی ستراتیژی داوە

هەڤاڵ سدیق
هەڤاڵ سدیق

K24 – هەولێر

بەرێوەبەری گشتی وەبەرهێنانی دهۆک رایگەیاند، لە سەردەمی کابینەی نۆیەمدا مۆڵەتمان بە چەندین پڕۆژەی ستراتیژی داوە، کە دەگاتە 80 پڕۆژە، ئەمەش جێبەجێکردنی ئامانجەکانی کابینەی نۆیەمە.

هەڤاڵ سدیق، بەرێوەبەری گشتی وەبەرهێنانی دهۆک بە کوردستان24ـی راگەیاند، ئێمە لە پارێزگای دهۆک مۆڵەتمان بە 289 پڕۆژە داوە لە سێکتەرە جیاجیاکان، وەکو سێکتەری نیشتەجێبوون و پیشەسازی و گەشتیاری و سێکتەری تەندروستی چاندانی تر.

گوتیشی: لە سەردەمی کابینەی نۆیەمدا مۆڵەتمان بە چەندین پڕۆژەی ستراتیژی داوە، کە دەگاتە 80 پڕۆژە، ئەمەش جێبەجێکردنی ئامانجەکانی کابینەی نۆیەمە، کە زیاتر گرنگی بەو پڕۆژانە دەدەین کە ستراتیژین و خزمەتی ژێرخانی ئابووری پارێزگای دهۆک بکات و هەروەها دەرفەتی کار بۆ دەرچووانی زانکۆ و پەیمانگاکان و هەموو خەڵکی ناوچەکە بڕەخسێنێت.

ئاماژەی بەوەشکرد، لەلایەکی دیکەوە گرنگیمان بە ئاسایشی خۆراک داوە، کە زیاتر مۆڵەت بەو پڕۆژانە بدەین کە گرێدراوی پیشەسازیی خۆراکن، ئەویش بەکارهێنانی بەرهەمی جوتیارانە.

بەرێوەبەری گشتی وەبەرهێنانی دهۆک باسی لەوەشکرد، ئێمە هەندێک ناوچەمان هەیە کشتوکاڵینە، ئەوە پڕۆژە کشتوکاڵییەکانمان دەبەینە ئەو شوێنە، هەندێک ناوچەی دیکە گەشتیارییە، پڕۆژە گەشتیارییەکانمان دەبەینە ئەو ناوچانە.

دەشڵێت: ئێمە گرنگیمان بە سێکتەری تەندروستیش داوە کە مۆڵەتمان بە چەند پڕۆژەیەکی تەندروستی و دروستکردنی نەخۆشخانە داوە وەکو دروستکردنی نەخۆشخانەی چارەسەرکردنی شێرپەنجە.