مارک سترۆ: ئەمەریکا پابەندە بە هاوبەشی درێژخایەن لەگەڵ عێراق و هەرێمی کوردستان
K24 – هەولێر:
کونسوڵی گشتیی ویلایه‌ته یه‌كگرتووه‌كانی ئەمەریکا لە هەولێر رایگه‌یاند، وڵاته‌كه‌ی پابەندە بە هاوبەشی درێژخایەن لەگەڵ عێراق و هەرێمی کوردستان، ئەم راگەیاندنەش دوای سەردانیکردن و کۆبوونەوەی کونسوڵی گشتیی ئەو وڵاتە دێت لەگەڵ فیرقەی دووی هێزه‌كانی پێشمه‌رگه.
رۆژی هەینی (23ـی شوباتی 2024) کونسوڵخانەی گشتیی ئەمەریکا لە هەولێر لە تۆڕی کۆمەڵایەتی ئێکس بڵاویکردەوە: مارک سترۆ، کونسوڵی گشتیی ئەمەریکا لە هەولێر بۆ گفتوگۆکردن لەبارەی کاراکردن و ئامادەباشی تەواوەتی هێزەکانی پێشمەرگە بەگوێرەی یاداشتنامەی ئەمەریکا و هەرێمی کوردستان، لەگەڵ فیرقەی دووی هێزه‌كانی پێشمه‌رگه كۆبووه‌ته‌وه.
بەگوێرەی راگەیەندراوەکەی کونسوڵخانەی گشتیی ئەمەریکا لە هەولێر، ئەمەریکا پابەندە بە هاوبەشی درێژخایەن لەگەڵ عێراق و هەرێمی کوردستان.
هاوكات وه‌زاره‌تی پێشمه‌رگه رایگه‌یاندووه: ئامانج له سه‌ردانه‌كه‌ی كونسوڵی گشتیی ئه‌مەریكا بۆ ئاگاداربوون بووه له چۆنیه‌تی به‌ڕێوه‌چوونی مه‌شق و راهێنانه‌كان.
وه‌زاره‌تی پێشمه‌رگەی حکومەتی هەرێمی کوردستان بڵاویکردووەتەوە، كونسوڵی گشتیی ئه‌مەریكا خۆشحاڵی خۆی نیشانداوه كه ئێستا پێشمه‌رگه به گوێره‌ی كارنامه‌ی لێكتێگه‌یشتنی نێوان وه‌زاره‌تی پێشمه‌رگه و وه‌زاره‌تی به‌رگریی ئه‌مەریكا هه‌نگاو ده‌نێت، ئه‌مه‌ش واده‌كات هێزی پێشمه‌رگه رۆڵێكی گرنگتر بگێڕێت.
CG Stroh met with Peshmerga from 2nd Division to discuss progress made toward becoming fully operational as outlined in the U.S.-KRG Memorandum of Understanding for Peshmerga Reform. The U.S. remains committed to our long-term partnership with Iraq and the Iraqi Kurdistan Region. pic.twitter.com/3gmZx8Zf8N
— U.S. Consulate General Erbil (@USCGERBIL) February 23, 2024