ئەردۆغان وادەی سەردانەکەی بۆ عێراق ئاشكرا کرد

رەجەب تەیب ئەردۆغان، سەرۆککۆماری تورکیا - وێنە: ئاژانسی ئەنادۆڵ
رەجەب تەیب ئەردۆغان، سەرۆککۆماری تورکیا - وێنە: ئاژانسی ئەنادۆڵ

K24 – هەولێر:

سەرۆککۆماری تورکیا وادەی سەردانە چاوەڕوانکراوەکەی بۆ عێراق ئاشکرا کرد و رایگەیاند، دوای هەڵبژاردنەکانی ئاداری ئەمساڵ سەردانی عێراق دەکات.

رۆژی دووشەممە (26ـی شوباتی 2024) رەجەب تەیب ئەردۆغان، سەرۆککۆماری تورکیا رایگەیاند، دوای هەڵبژاردنی شارەوانییەکان لە کۆتایی ئاداری ئەمساڵ سەردانی عێراق دەکات.

لەلایەن خۆیەوە، پەیامنێری کوردستان24 لە ئەنقەرە رایگەیاند، ئەردۆغان لە ناوەندی سەرەکی ئاکپارتی گوتەیەکی پێشکەش کرد و رایگەیاند، دوای هەڵبژاردنەکانی ئاداری ئەمساڵ سەردانی عێراق دەکات.

پەیامنێری کوردستان24 ئاماژەی بەوەشکرد، چاوەڕێ دەکرێت لە سەردانەکەی بۆ عێراق، سەرۆککۆماری تورکیا سەردانی هەرێمی کوردستانیش بکات و ئەجێندای کۆبوونەوەکەشی لەگەڵ بەرپرسانی باڵای عێراق و هەرێمی کوردستان پرسی دەستپێکردنەوەی هەناردەکردنی نەوتی هەرێمی کوردستان لە رێگەی بەندەری جەیهانی تورکیا و کردنەوەی رێگەی گەشەپێدان کە رێگەیەکی نوێی بازرگانی نێوان هەردوو وڵاتە، لەگەڵ پرسی ئەمنی و ئاو و پەیوەندی دیپلۆماسی نێوان ئەنقەرە لەگەڵ بەغدا و هەولێر بەشێکی دیکەی ئەجێندای کۆبوونەوەکانی ئەردۆغان دەبێت.

هاوکات پەیامنێری کوردستان24 ئاماژەی بەوەشکرد، پرسەنامەکەی دوێنێی رەجەب تەیب ئەردۆغان بۆ سەرۆک بارزانی بەهۆی کۆچی دوایی خاتوو زەکیا مستەفا بارزانی، دەنگدانەوەی لە میدیاکانی تورکیا هەبوو کە بە گرنگییەوە باسیان لەو نامە هاوخەمییەی ئەردۆغان بۆ سەرۆک بارزانی کراوە.

وابڕیارە (31ـی ئاداری 2024) هەڵبژاردنی شارەوانییەکان لە تورکیا و باکووری کوردستان بەڕێوەدەچێت و بە گوێرەی ئاماری کۆمیسیۆنی باڵای هەڵبژاردنەکانی تورکیا، لە هەڵبژاردنی شارەوانییەکاندا 36 پارتی سیاسی مافی ئەوەیان هەیە بەشداری بکەن لەوانەش: دەم پارتی، ئاکپارتی، جەهەپە، مەهەپە، ئیی پارتی، دەڤا، سەعادەت، ئاییندە، هوداپار و تەواوی ئەو فراکسیۆنانەی کە لە پەرلەمانی تورکیا کورسییان هەیە و ئەو پارتە تۆمارکراوانەی کورسی پەرلەمانییان بەدەستنەهێناوە دەتوان بەشداری بکەن.