شاهۆ قەرەداغی: ئیرادەیەکی جددی لە عێراق بۆ چارەسەرکردنی کێشەکان لەگەڵ هەرێمی کوردستان نییە

شاهۆ قەرەداغی، شرۆڤەکاری سیاسی
شاهۆ قەرەداغی، شرۆڤەکاری سیاسی

K24 – هەولێر:

شرۆڤەکارێکی سیاسی، کابینە یەک لە دوای یەکەکانی حکومەتی عێراق هەرگیز هەوڵیان نەدەوا کێشەکان لەگەڵ هەرێمی کوردستان چارەسەر بکەن سەرباری بەڵێنەکانیان. هاوکات دەڵێت: هەرێمی کوردستان هەڵیداوە پەیوەندییەکانی لەگەڵ وڵاتان زیاتر پەرەپێبدات.

شاهۆ قەرەداغی، شرۆڤەکاری سیاسی، لەمیانەی بەشداریکردنی لە گەشتێکی هەواڵەکانی کوردستان24 رایگەیاند، ئەو عێراقەی کە رێککەوتنی لەسەر کرا دەبوو لە دوای 2003ـەوە عێراقێکی دیموکراسی بێت و مافی هەموو لایەنەکان بدرێت.

ئەو شرۆڤەکارە سیاسییە دەڵێت: لایەنە شیعییەکان هەڵگری ئایدۆلۆژییەکی توندڕەون، بڕوایان بە وڵاتێک نییە بە ناوی عێراقەوە، بەڵکو بڕوایان بە نموونەیەکی دینی ئایدۆلۆژی ئێرانی هەیە، کە هەوڵدەدەن لە عێراق بیچەسپێنن، هەر ئەمەش وایکردن عێراق تووشی شەڕی ناوخۆیی و مەزهەبی بێت و کەمینەکان نەمان هەموو روویان لە هەرێمی کوردستان کرد.

شاهۆ قەرەداغی، ئاشکرایکرد، شیعەکان لە دوای لاوازکردنی سووننەکان لە عێراق، دەستیان بە هەڵمەتێک کرد بۆ ئەوەی هەرێمی کوردستانیش لاواز بکەن بۆیە لە ساڵانی 2009 و 2010 هەوڵێکی جددی هەبوو بۆ ئەوەی هێرش بکەنە سەر هەرێمی کوردستان.

ئەو شرۆڤەکارە سیاسییە، روونیکردەوە، ئەو کەسەی کە لە بەغدا حوکم دەکات بڕوای بە دەوڵەتی نەتەوایەتی  و دیموکراسییەت و ئەو پرەنسیپانە نییە کە لە 2003 لەسەری رێککەوتبوون.

شاهۆ قەرەداغی گوتی: هەر کابینەیەکی حکومەتی عێراق کە پێکدەهێندرێت بەڵێن دەدات کێشەکان چارەسەر بکات، بەڵام ئەوەی کە دەبیندرێت ساڵانە گرفتەکان زیاتر و زیاتر دەبن لەبری ئەوەی کەمتر بن، بۆیە تاوەکو ئێستا ئیرادەیەکی جددی نەبووە بۆ ئەوەی کێشەکان لەگەڵ هەرێمی کوردستان چارەسەر بکرێن.

ئەو شرۆڤەکارە سیاسییە، گوتیشی: میلیشیاکان هەستیان کرد دوای ئەوەی ئەو هەموو هێرشەیان کردە سەر هەرێمی کوردستان دەرەنجامەکان پێچەوانە بوو و هەرێمی کوردستان ملکەچ نەبوو بەو هێرشانە، بەڵکو هەرێمی کوردستان هەڵیداوە پەیوەندییەکانی لەگەڵ وڵاتانی جیهان زیاتر چالاک و پەرەپێبدات.