مەجید حەقی: ئەمەریکا و هەرێمی کوردستان ئامانج و بەرژەوەندییەکانیان هاوبەشن

مەجید حەقی، شرۆڤەکاری سیاسی
مەجید حەقی، شرۆڤەکاری سیاسی

K24 – هەولێر:

شرۆڤه‌كارێکی سیاسی دەڵێت: بوونی کورستانێکی سەقامگیر لە قازانجی درێژخایەنی ئەمەریکا و خەڵکی هەرێمی کوردستانە.

مەجید حەقی، شرۆڤەکاری سیاسی بە کوردستان24ـی راگەیاند، پەیوەندییەکانی نێوان هەرێمی کوردستان و ئەمەریکا لەمێژینەیە و بە چەند قۆناغێکدا تێپەڕیوە.

ئەو شرۆڤەکارە سیاسییە دەڵێت: هەرێمی کوردستان رۆڵێکی بەرچاوی هەبووە لە دامەزراندنی دەوڵەتی فیدراڵی لە عێراق و پەسەندکردنی دەستووری ئەو وڵاتە.

مەجید حەقی، ئاماژەی بەوەدا، رۆژهەڵاتی ناوەڕاست دەکوڵیت و پڕە لە ئالنگاری و جەنگ، بەڵام خۆشبەختانە هەرێمی کوردستان تا ئێستا توانیویەتی ئەو هاوسەنگییە بپارێزێت کە نەبێتە شوێنی ململانێکان.

ئەو شرۆڤەکارە سیاسییە، گوتیشی: ئەمەریکا و هەرێمی کوردستان ئامانج و بەرژەونەدییەکانیان هاوبەشن، هەروەها بوونی کورستانێکی سەقامگیر لە قازانجی درێژخایەنی ئەمەریکا و خەڵکی کوردستانە.

رۆژی پێنجشەممە (29ـی شوباتی 2024) عه‌لا نشوع، پسپۆڕی ستراتیژی بە کوردستان24ـی راگەیاند، سەردانی سەرۆکوەزیران مەسرور بارزانی بۆ واشنتن سەردانێکی سەرکەوتوو بوو، راستییەکی ئەم سەردانە لە چوارچێوەی چەندین ئالنگاری هاتووە کە ئێستا لەبەردەم عێراق و هەرێمی کوردستانە.

ئەو پسپۆڕە ستراتیژییە ئاماژەی بەوەدا، سەردانەکەی سەرۆکی حکومەتی هەرێمی کوردستان ئەنجامی زۆر گەورە و باشی دەبێت، ئەو ئەنجامانەش بە شێوەیەکی گشتی کاریگەری لەسەر عێراق و ناوچەکە دەبێت، بە دیاریکراوی هەرێمی کوردستان پێویستی بە هاوکاری ئەمەریکا هەیە.

عەلا نەشوع بە گرنگییەوە باسی حکومەتی هەرێمی کوردستان دەکات و دەڵێت: حکومەتی هەرێمی کوردستان توانیویەتی حکومەتێکی میانڕەو و نموونەیی بێت. گوتیشی: ئەمەریکا پەیوەندییەکی پتەوی لەگەڵ هەرێمی کوردستاندا هەیە.