دۆگڵاس سلیمان: هەرێمی کوردستان هاوپەیمانێکی گرنگیی ئەمەریکایە

دۆگڵاس سییمان، باڵیۆزی پێشووتری ئەمەریکا لە عێراق
دۆگڵاس سییمان، باڵیۆزی پێشووتری ئەمەریکا لە عێراق

K24 – واشنتن:

باڵیۆزی پێشووتری ئەمەریکا لە عێراق، رایدەگەیەنێت؛ ئەمەریکا پاڵپشتی لە فیدراڵیزم دەکات لە عێراق، هەروەها پاڵپشتی لە کوردستانێکی بەهێز دەکات. هاوکات دەڵێت: هەرێمی کوردستان هاوپەیمانێکی گرنگیی ئەمەریکایە.

بەرەبەیانی ئەمڕۆ هەینی (1ـی ئاداری 2024) دۆگڵاس سلیمان، باڵیۆزی پێشووتری ئەمەریکا لە عێراق بە کوردستان24ـی راگەیاند، زۆر گرنگە کە سەرۆکوەزیرانی هەرێمی کوردستان لە واشنتنە، چونکە پەیوەندییەکانی نێوان ئەمەریکا و هەرێمی کوردستان زۆر باشن.

باڵیۆزی پێشووتری ئەمەریکا لە عێراق، دەڵێت: هەرێمی کوردستان لەلایەن ئەمەریکاوە پاڵپشتییەکی زۆر دەکرێت، هەورەها هەرێمی کوردستان لەلایەن حکومەتی عێراقەوە گوشاری زۆری لەسەرە.

دۆگڵاس سلیمان، ئاماژەی بەوەدا، دەستووری عێراق کە چەندیدن ساڵ لەمەوبەر داندراوە زۆر بە جوانی باسی لە ئۆتۆنۆمی هەرێمی کوردستان کردووە، بەڵام لە ئێستادا دادگای فیدراڵی ئەم بەشەی دەستووری فەرامۆش کردووە و دەسەڵاتی زیاتری داوەتە ناوەند، بڕیارەکانی دادگای فیدراڵی باش نابێت بۆ هەرێمی کوردستان، هەروەها بۆ عێراقیش باش نابێت.

باڵیۆزی پێشووتری ئەمەریکا لە عێراق، گوتی: ئەمەریکا پاڵپشتی لە فیدراڵیزم دەکات لە عێراق، هەروەها پاڵپشتی لە کوردستانێکی بەهێز دەکات، کوردستانێک کە لە رووی ئابوورییەوە سەربەخۆ بێت. سەرنجی بۆ ئەوەش راکێشا، هەرێمی کوردستان هاوپەیمانێکی گرنگیی ئەمەریکایە.

دۆگڵاس سلیمان، هیواشی خواست حکومەتی عێراق ئەو دەرفەتانە ببینێت کە لە هەرێمی کوردستان هەن و، خۆی باشتر بکات و چاو لە هەرێمی کوردستان بکات.

ئێوارەی رۆژی (24ـی شوباتی 2024) بە بانگهێشتێکی فەرمی، مەسرور بارزانی، سەرۆکی حکومەتی هەرێمی کوردستان گەیشتە واشنتنی پایتەختی ئەمەریکا و بەگوێرەی راگەیەندراوی نووسینگەی راگەیاندنی سەرۆکوەزیران مەسرور بارزانی، چەندین دیداری لەگەڵ بەرپرسانی باڵای ئەو وڵاتە لە کۆشکی سپی، وەزارەتی دەرەوە و کۆنگرێس دەبێت کە تەوەری سەرەکی کۆبوونەوەکان، پەرەپێدانی زیاتری پەیوەندییەکانی هەرێمی کوردستان و ئەمەریکا و دوایین گۆڕانکاری و پەرەسەندنەکانی دۆخی گشتی عێراق و ناوچەکە دەبێت.