پرۆژە شکستخواردووەکان زیاتر لە 16 ملیار دۆلار زیانیان بە عێراق گەیاندووە
K24 – هەولێر:
جێگری سەرۆکی لێژنەی خزمەتگوزاری و ئاوەدانکردنەوە لە پەرلەمانی عێراق ئاشکرایکرد، زیاتر لە 1600 پرۆژەی شکستخواردوویان لە عێراق تۆمارکردووە.
ئەمڕۆ یەکشەممە (17ـی ئاداری 2024) باقر ساعدی جێگری سەرۆکی لێژنەی خزمەتگوزاری و ئاوەدانکردنەوە لە پەرلەمانی عێراق رایگەیاند، زیاتر لە 1600 پرۆژەی شکستخواردوویان لە عێراق تۆمارکردووە کە ئەو پرۆژانە هۆکاربوون بۆ بەهەدەردانی زیاتر لە 16 ملیار دینار.
جێگری سەرۆکی لێژنەی خزمەتگوزاری و ئاوەدانکردنەوە لە پەرلەمانی عێراق ئاماژەی بەوەشدا، زۆرینەی ئەو پرۆژانە لە سەردەمی کابینەکەی نووری مالیکییەوە راگیراون.
لەلایەن خۆیەوە، مەحما خەلیل، ئەندامی لێژنەی خزمەتگوزاری و ئاوەدانکردنەوە لە پەرلەمانی عێراق ئاشکرای دەکات، بەشێکی زۆری ئەو پرۆژە شکستخواردووانە تەمەنیان بۆ 15 ساڵ لەمەوپێش دەگەڕێتەوە و هیچکام لە کابینەکانی پێشووی حکومەت هەنگاویان بۆ دەستپێکردنەوەیان نەگرتووەتەبەر.