سامان سۆرانی: هه‌نگاوه‌كه‌ی پارتی ئه‌رێنی و بوێرانه‌یه و هه‌مان خواستی خه‌ڵكی كوردستانه
K24 - هەولێر:
شرۆڤه‌كارێكی سیاسی ئاماژه به‌وه ده‌كات، هه‌نگاوه‌كه‌ی پارتی دیموكراتی كوردستان ئه‌رێنی و بوێرانه‌یه و هه‌مان خواستی خه‌ڵكی كوردستانه. ده‌شڵێت، پارتی چیدیكه قبووڵ ناكات قه‌واره‌ی ده‌ستووری هه‌رێمی كوردستان به ئامانج بگیرێت و هه‌ڕه‌شه‌ی لێ بكرێت.
ئه‌مڕۆ (دووشه‌ممه 18ـی ئاداری 2024) سامان سۆرانی، شرۆڤه‌كاری سیاسی تایبه‌ت به كوردستان24 رایگه‌یاند، هۆكاری سه‌ره‌كی هه‌ڵوێستی پارتی دیموكراتی كوردستان له‌باره‌ی هه‌ڵبژاردنی په‌رله‌مانی كوردستان و به‌شداریكردنی له پرۆسه‌ی سیاسی عێراق، بۆ ده‌ستوه‌ردانه به‌رده‌وامه‌كانی دادگای فیدڕاڵی له كاروباری هه‌رێمی كوردستان ده‌گه‌ڕێته‌وه.
سامان سۆرانی ئاماژه‌ی به‌وه‌ش كرد، دادگای فیدڕاڵی له بڕیاره‌كانیدا جومگه بنه‌ڕه‌تییه‌كانی پێكه‌وه‌ژیانی له كوردستان به ئامانج گرت، به‌شێوه‌یه‌ك پێكهاته‌كانی له مافی به‌شداریكردن له په‌رله‌مانی كوردستان بێبه‌ش كرد.
سامان سۆرانی باسی له‌وه‌ش كرد، هه‌نگاوه‌كه‌ی پارتی دیموكراتی كوردستان ئه‌رێنی و بوێرانه‌یه و هه‌مان خواستی خه‌ڵكی كوردستانه بۆ ئه‌وه‌ی رێگری له هه‌وڵه‌كان بۆ بچووككردنه‌وه‌ی قه‌واره‌ی ده‌ستووری هه‌رێمی كوردستان بگرن.
ئه‌و شرۆڤه‌كاره سیاسییه سه‌رنجی بۆ ئه‌وه‌ش راكێشا، ئه‌گه‌ر پارتی له حكومه‌تی عێراق بكشێته‌وه، كاریگه‌ری نه‌رێنی به‌سه‌ر پڕۆسه‌ی سیاسی و حوكمڕانی له عێراق دروست ده‌كات، به‌تایبه‌ت كه پارتی لایه‌نێكی سه‌ره‌كی پێكهێنانی حكومه‌تی ئێستا و بونیاتنانه‌وه‌ی عێراقی نوێیه له‌دوای ساڵی 2003.
جه‌ختیشیكرده‌وه پارتی دیموكراتی كوردستان به نوێنه‌رایه‌تی گه‌لی كوردستان و به‌و بیرۆكه نه‌ته‌وه‌ییه‌ی هه‌یه‌تی، چیدیكه قبووڵ ناكات قه‌واره‌ی ده‌ستووری هه‌رێمی كوردستان به ئامانج بگیرێت و هه‌ڕه‌شه‌ی لێ بكرێت.
ئەمڕۆ دووشەممە، 18-03-2024، مەکتەبی سیاسیی پارتی دیموکراتی کوردستان بەیاننامەیەکی لەبارەی دۆخی ئێستای عێراق، پەیوەندییەکانی هەولێر و بەغدا، هەڵبژاردنی پەرلەمانی کوردستان، بڕیارەکانی دادگای فیدراڵی و چەند پرسێکی دیکە بڵاوکردەوە.
مەكتەبی سیاسی پارتی دیموكراتی كوردستان دەڵێت، "لایەنەکانی هاوپەیمانی ئیدارەی دەوڵەت دەخەینە بەردەم بەڕپرسیارێتیی نیشتمانی لە جێبەجێنەکردنی دەستوور و تەواوی خالەکانی رێککەوتنی سیاسی و ئیداریی پێکهێنانی کابینەی ئێستای حکومەتی عێراق بە سەرۆکایەتیی محەممەد شیاع سوودانی، بەپێچەوانەشەوە ناتوانین بەردەوام بین لە پڕۆسەی سیاسی دا".
مەكتەبی سیاسی پارتی ئاماژەی بەوەش کردووە، "لە سۆنگەی تێگەیشتنمان لە پێگە و بەرپرسیارێتی مێژووییمان لە پاراستنی مافە ڕەواكانی گەلی كوردستان و سیستەمی دیموكراسی و فيدراڵی عێراق، هەروەها ڕەوایی نەدان بە هەڵبژاردنێكی نا دەستووری و نا دیموكراسی، و وەستانەوە لە بەرامبەر سەرجەم ئەو پێشێلکاریانەی دەستوور کە لەلایەن دادگای باڵای فیدراڵییەوە بەرامبەر هەرێمی کوردستان و دامەزراوە دەستورییەکانی ئەنجام دەدرێت بەگشتی، و سەپاندنی هەموارە نادەستوریەكانی یاسای هەڵبژاردنی خولی شەشەمی پەرلەمانی کوردستان بەتایبەتی، بە بەرژەوەندی گەل و نیشتمانەکەمانی دەزانین كە پارتیمان نەچێتە ژێر باری پەسەندکردنی بریاری نادەستووریی و سیستەمێکی سەپێنراو لە دەرەوەی ئیرادەی گەلی هەرێمی كوردستان و دامەزراوە دەستوورییەکانی و بەشداری هەڵبژاردنێک نەكات کە بە نایاسایی و نادەستوری و لەسایەی سیستەمیکی سەپێنراودا بەڕێوەبچێت".