بە فەرمی یاریی داهاتووی هەولێر بۆ كاتێكی نادیار دواخرا
فیدراسیۆنی تۆپی پێی عێراق بڕیاریی دا یاریی داهاتووی یانەی هەولێر لە خولی ئەستێرەكانی عێراق بەرامبەر یانەی كارەبا بۆ كاتێكی نادیار دوابخات.
بڕیار بوو رۆژی یەكشەممەی داهاتوو لە گەڕی 22ـی خولی ئەستێرەكانی عێراق، یانەی هەولێر لە دەرەوەی یاریگەی خۆی لە بەغدا ببێتە میوانی یانەی كارەبا، بەڵام یارییەكە دواخرا.
فیدراسیۆنی تۆپی پێی عێراق لەسەر داوای یانەكان بڕیاریی دا یاریی ئەو یانانە دوابخات كە یاریزانەكانیان پەیوەندییان بە هەڵبژاردەی ئۆڵمپی عێراق كردووە، لە ریزەكانی یانەی هەولێر هەریەكە لە هەڵۆ فایەق و ئەحمەد مەكەنزی بە مەبەستی پەیوەندیكردنیان بە هەڵبژاردەی ئۆڵمپی عێراق گەشتی دەوحەیان كردووە كە بڕیارە هەفتەی داهاتوو پاڵەوانێتی جامی ئاسیا بۆ خوار تەمەن 23 ساڵ لە قەتەر دەستپێبكات.
فیدراسیۆنی تۆپی پێی عێراق بڕیاری دا جگە لە یارییەكەی هەولێر، یاریی كەربەلا و تەڵەبەش دوابخات، بەڵام سەرەڕای بەشداریكردنی عەلی جاسم لەگەڵ ئۆڵمپی عێراق، بەڵام قوە جەوییە ئامادە نەبوو یاریی داهاتووی بەرامبەر نەفتی میسان دوابخات.
