وادەی سەردانەکەی ئەردۆغان بۆ عێراق ئاشکراکرا

رەجەب تەیب ئەردۆغان، سەرۆککۆماری تورکیا
رەجەب تەیب ئەردۆغان، سەرۆککۆماری تورکیا

K24 - هەولێر

دوای 12 ساڵ، وا بڕیارە 22ـی نیسانی داهاتوو رەجەب تەیب ئەردۆغان، سەرۆککۆماری تورکیا سەردانی عێراق بکات.

ماڵپەری "یەنی شەفەق" خشتەی سەردانەکانی رەجەب تەیب ئەردۆغان، سەرۆککۆماری تورکیای بڵاوکردەوە و رایگەیاند، دوای 12 ساڵ؛ ئەردۆغان لە 22ـی ئەم مانگە بە سەردانێکی فەرمی دەگاتە عێراق و لەگەڵ بەرپرسە باڵاکانی ئەو وڵاتە کۆدەبێتەوە.

ماڵپەڕەکە راشیگەیاندووە، سەردانەکەی ئەردۆغان گرنگیی ئابووری و دیپلۆماسی زۆری هەیە بەتایبەتی دوای ناوبڕێکی زۆر سەردانی عێراق دەکاتەوە.

پێشتر سەرچاوەکانی سەر بە وەزارەتی دەرەوەی عێراق رایگەیاندبوو، ئەردۆغان جگە لە بەغدا، سەردانی هەولێر دەکات و ژمارەیەک کۆبوونەوەی باڵای دەبێت.

ئەم سەردانەی ئەردۆغان بۆ بەغدا دەبێتە یەکەم سەردانی سەرۆککۆماری تورکیا لەوەتی سەردانەکەی تورگوت ئۆزال لە کۆتایی هەشتاکانی سەدەی رابردوو، هەرچەندە لە ساڵانی 2008، 2009 و 2011، ئەردۆغان وەک سەرۆکوەزیرانی تورکیا سەردانی بەغدای کرد لەوکاتەشدا نوری مالیکی، سەرۆکوەزیرانی عێراق بوو.

پێشتریش لە رۆژی (22ـی ئابی 2023) هاکان فیدان، وەزیری دەرەوەی تورکیا سەردانێکی سێ رۆژەی بۆ عێراق و هەرێمی کوردستان ئەنجامدا و دوای کۆبوونەوەی لەگەڵ مەسرور بارزانی، سەرۆکی حکومەتی هەرێمی کوردستان لە (24ـی ئابی 2023) کە ئەلپئەرسلان بەیرەکتار، وەزیری وزە و سەرچاوە سرووشتییەکانی تورکیا ئامادەی بوو، لە کۆنفرانسێکی رۆژنامەوانی هاوبەشدا لەگەڵ سەرۆکوەزیران مەسرور بارزانی، هاکان فیدان جەختی لە خواستی پەرەپێدانی پەیوەندییەکانی ئەنقەرە لەگەڵ هەولێر دووپاتکردەوە و رایگەیاند، "هەروەک چۆن لەماوەی رابردوودا هەولێر سەقامگیرتر و ئاوەدانتر بووە لەچاو ناوچەکانی دیکەی عێراق، دەمانەوێت بەوشێوەیە بمێنێتەوە و لەو پێناوەشدا ئامادەین بۆ هەموو هاوکارییەک".