وەزارەتی دەرەوەی ئێران بانگهێشتی باڵیۆزانی بەریتانیا، ئەڵمانیا و فەرەنسای کرد

ئاڵاکانی هەر یەکە لە وڵاتانی ئەڵمانیا، بەریتانیا و فەڕەنسا
ئاڵاکانی هەر یەکە لە وڵاتانی ئەڵمانیا، بەریتانیا و فەڕەنسا

K24 - هەولێر

بەهۆی لێدوانەکانیان دەربارەی هێرشی ئێران بۆ سەر ئیسرائیل؛ وەزارەتی دەرەوەی ئێران بانگهێشتی باڵیۆزانی بەریتانیا، ئەڵمانیا و فەرەنسای کرد. 

ئاژانسی هەواڵی رۆیتەرز ئاشکرای کردووە، بەهۆی لێدوانە توندەکانیان دەربارەی هێرشی ئێران بۆ سەر ئیسرائیل و سەرکۆنەکردنی تاران؛ وەزارەتی دەرەوە ئێران بانگهێشتی باڵیۆزانی بەریتانیا، فەرەنسا و ئەڵمانیای لە تاران کردووە و نیگەرانیی خۆی سەبارەت بە لێدوانەکانی سەرکردە و حکوومەتەکانیان پێ گەیاندوون.

ئاژانسی ڕۆیتەرز باسی لەوەش کردووە، وەزارەتی دەرەوەی ئێران بۆ باڵیۆزانی ئەو سێ وڵاتەی ڕوونکردووتەوە کە ئێران بەمافی خۆی دەزانێت دژی هێرشەکانی ئیسرائیل بەرگریی لەخۆی بکات.

شەوی شەممە، 13-04-2024، دەوروبەری کاتژمێر 11:00، سوپای پاسدارانی ئێران بە دەیان مووشەک و درۆنی بۆمبڕێژکراوەوە، هێرشەکەی بۆ سەر ئیسرائیل دەست پێکرد. ئەم هێرشەی تاران لە وەڵامی کوژرانی حەوت ئەندامەکەی سوپای پاسداران بوو کە لە هێرشێکی ئیسرائیل بۆ سەر کونسوڵخانەکەی لە دیمەشقی پایتەختی سووریا کرانە ئامانج.

دانیاڵ هەگاری، گوتەبێژی وەزارەتی بەرگریی ئیسرائیل، لە کۆنفرانسێکی ڕۆژنامەوانیدا ڕایگەیاند، سیستەمی بەرگریی ئاسمانی ئیسرائیل، توانیویەتی سەدا 99ـی درۆن و مووشەکەکانی ئێران بخاتە خوارەوە، پێش ئەوەی بگەنە ناو ئەلئەڤیڤ و شارەکانی دیکە. گوتیشی، لە ئەنجامی هێرشەکەی ئێران؛ کچێکی تەمەن 10 ساڵان بە سووکی لە باشووری ئیسرائیل بریندار بووە.

بە گوتەی بەرپرسە ئەمنییەکانی ئیسرائیل؛ ئێران لە هێرشەکەی شەوی رابردوویدا، 170 درۆن، 30 مووشەکی جۆری "کرووز" و 120 مووشەکی بالیستی ئاراستەی ئیسرائیل کردووە و زۆرینەیان خراونەتە خوارەوە. هاوکات بەشێکی ئەو مووشەک و درۆنانە، لە ئاسمانی عێراق و هەرێمی کوردستان خرانە خوارەوە.

هێرشەکەی ئێران لەسەر ئاستی نێودەوڵەتی کاردانەوەی لێکەوتەوە؛ یەکێتیی ئەوروپا و هەر یەکە لە وڵاتانی ئه‌مه‌ریكا، بەریتانیا، فەرەنسا، ئەڵمانیا، ئیتاڵیا، سعوودیە و چەندین وڵاتانی دیکەی ناوچەکە "بە توندی" هێرشەکەیان سەرکۆنە کرد. وابڕیاریشە،  ئەمڕۆ یەکشەممە، ئەنجوومەنی ئاسایشی نەتەوە یەکگرتووەکان کۆبوونەوەیەکی بەپەلە لەبارەی هێرشەکە بکات.