پشتیوان سادق: یەکێک لەشانازییە دێرینەکانی وڵاتە شیرینەکەمان، بوونی گیانی تەبایی نێوان ئایین و پێکھاتەکانه‌

پشتیوان سادق، وەزیری ئەوقاف و کاروباری ئایینی حکوومەتی هەرێمی کوردستان
پشتیوان سادق، وەزیری ئەوقاف و کاروباری ئایینی حکوومەتی هەرێمی کوردستان

K24 - هەولێر:

بەبۆنەی ھاتنی جەژنی سەری ساڵی ئێزدیان، دكتۆر پشتیوان سادق، وه‌زیری ئه‌وقاف و كاروباری ئایینی په‌یامێكی پیرۆزبایی بڵاوكرده‌وه‌، له‌ به‌شێكیدا هاتووه‌: یەکێک لەشانازییە دێرینەکانی وڵاتە شیرینەکەمان، بوونی سروشتی جوان و تابلۆی ھەمەڕەنگی پێکەوەیی و گیانی تەبایی نێوان ئایین و پێکھاتەکانه‌.

ده‌قی په‌یامه‌كه‌ی وه‌زیری ئه‌وقاف و كاروباری ئایینی حكوومه‌تی هه‌رێمی كوردستان:

بەبۆنەی ھاتنی جەژنی سەری ساڵی ئێزدیان، پیرۆزبایی ئاراستەی بەڕێزان میری ئێزدیان و ئەنجوومەنی ڕوحانی و خوشک و برایانی ئێزدی لە کوردستان و جیھان دەکەین، ئومێدەوارین ھاتنی جەژنتان ببێتە مایەی خۆشی و کامەرانیی بۆ ئێوە و خێزانە بەڕێزەکانتان.

یەکێک لە شانازییە دێرینەکانی وڵاتە شیرینەکەمان، بوونی سروشتی جوان و تابلۆی ھەمەڕەنگی پێکەوەیی و گیانی تەبایی نێوان ئایین و پێکھاتەکانی کوردستانە، کە بووه‌ته‌ ھێمای پرشنگدار بۆ خەڵکە سەربەرزەکەی، حکوومەتی کوردستان بە ئەوپەڕی توانایەوە داکۆکی لەماف و ژیان و پاراستنی سەرجەم ئایین و پێکھاتەکان دەکات، لەم وڵاتەدا مێژووی ھاوبەش و شارستانیەت و خەباتی دێرین، پێکەوە ھەمووان کۆدەکاتەوە.

بۆیە ھەموو پێکھاتە و ئایینەکان بۆ کوردستان و کوردستانیش بۆ ھەمووانە.

جەژنتان پیرۆز بێت 

دكتۆر پشتیوان سادق 

وه‌زیری ئه‌وقاف و كاروباری ئایینی