گوتەبێژی پارتی: هەڵوێستەکانمان دەربارەی هەڵبژاردنی پەرلەمانی کوردستان نەگۆڕاوە

مەحموود محەممەد، گوتەبێژی پارتی دیموکراتی کوردستان
مەحموود محەممەد، گوتەبێژی پارتی دیموکراتی کوردستان

K24 – هەولێر:

مەحموود محەممەد، گوتەبێژی پارتی دیموکراتی کوردستان، دەڵێت: وەک پارتی لەگەڵ سیستەمی هەڵبژاردن و ڕێگریی لە بەشداریی پێکهاتەکان، کۆک نەبووین.

مەحموود محەممەد، گوتەبێژی پارتی دیموکراتی کوردستان، لەبارەی هەڵوێستی حزبەکەی سەبارەت بە بەشدارینەکردن لە هەڵبژاردنی پەرلەمانی کوردستان ڕایگەیاند، وەک پارتی لەگەڵ سیستەمی هەڵبژاردن و ڕێگریی لە بەشداریی پێکهاتەکان کۆک نەبووین.

گوتەبێژی پارتی دیموکراتی کوردستان، دەڵێت: هەڵوێستەکانمان دەربارەی هەڵبژاردنی پەرلەمانی کوردستان، نەگۆڕاوە.

ڕۆژی (18ـی ئاداری 2024) مەکتەبی سیاسیی پارتی دیموکراتی کوردستان ڕاگەیەندراوێکی لەبارەی دۆخی ئێستەی عێراق، پەیوەندییەکانی هەولێر و بەغدا، هەڵبژاردنی پەرلەمانی کوردستان، بڕیارەکانی دادگای فیدراڵی بڵاو کردەوە و ڕایگەیاند: "بە بەرژەوەندیی گەل و نیشتمانەکەمانی دەزانین كە پارتیمان نەچێتە ژێرباری پەسەندکردنی بڕیاری نادەستووری و سیستەمێکی سەپێنراو لە دەرەوەی ئیرادەی گەلی هەرێمی كوردستان و دامەزراوە دەستوورییەکانی و بەشداریی هەڵبژاردنێک نەكات کە بە نایاسایی و نادەستووری و لەسایەی سیستەمیکی سەپێنراودا بەڕێوە بچێت".

ئەو هەڵوێستەی پارتی دوای بڕیارەکەی دادگای فیدراڵی عێراق هات لە ڕۆژی (21ـی شوباتی 2024) کە دوای 11 جار دواخستنی دانیشتنەکانی لەبارەی یاسای هەڵبژاردنی پەرلەمانی کوردستانەوە بڕیاری دا، بۆ خولی شەشەمی هەڵبژاردنی پەرلەمانی کوردستان؛ هەرێمی کوردستان بەسەر چوار بازنەی هەڵبژاردندا دابەش بکرێت و ژمارەی کورسیی کۆتاکان کە 11 کورسین، هەڵوەشاندەوە، بەو پێیەش کۆی ژمارەی کورسییەکانی پەرلەمانی کوردستان لە 111 کورسییەوە بۆ 100 کورسی کەم دەبنەوە.