چواس حه‌سه‌ن: پارتی هه‌ڵبژاردن وه‌كوو جه‌وهه‌ریی دیموكراسی ده‌بینێت

K24 - هەولێر:

چاودێرێكی سیاسی ئاماژه‌ به‌وه‌ ده‌كات، هه‌ڵبژاردن و دیموكراسی له‌ یه‌كدی جیا ناكرێنه‌وه‌؛ ده‌شڵێت؛ هه‌ڵبژاردن ده‌بێت به‌ پێی پێوه‌ره‌ نێوده‌وڵه‌تییه‌كان پاك و بێگه‌رد بێت.

ئه‌مڕۆ (هه‌ینی 3ـی ئایاری 2024) چواس حه‌سه‌ن، مامۆستای زانكۆ و چاودێری سیاسی تایبه‌ت به‌ كوردستان24 ڕایگه‌یاند، پارتی دیموكراتی كوردستان له‌ دوای ڕاپه‌ڕینی ئاداری 1991ـوه‌ به‌ سه‌رۆكایه‌تی و پێشه‌نگایه‌تی سه‌رۆك بارزانی یه‌كه‌م لایه‌نی كوردستان بووه‌ كه‌ داوای هه‌ڵبژاردن و پێكهێنانی په‌رله‌مانی كردووه‌.

چواس حه‌سه‌ن ئاماژه‌ی به‌وه‌ش كرد، ڕابردوو سه‌لماندوویه‌تی كه‌ پارتی هه‌میشه‌ ئاماده‌ بووه‌ بۆ به‌شداریكردن له‌ هه‌ڵبژاردن و هه‌ر پێشه‌نگیش بووه‌.

ئه‌و مامۆستایه‌ی زانكۆ گوتیشی، پارتی هه‌ڵبژاردن وه‌كوو پرسێكی جه‌وهه‌ریی دیموكراسی ده‌بینێت و مامه‌ڵه‌ی له‌گه‌ڵدا ده‌كات.

ناوبراو باسی له‌وه‌ش كرد، پارتی له‌ پرۆسه‌ی دیموكراسی له‌ هه‌رێمی كوردستان و عێراق خۆی به‌ به‌رپرس ده‌زانێت، بۆیه‌ داكۆكی له‌ به‌ڕێوه‌چوونی هه‌ڵبژاردنێكی ئازاد ده‌كات.

ڕۆژی دووشەممە، 18-03-2024، مەکتەبی سیاسیی پارتی دیموکراتی کوردستان بەیاننامەیەکی لەبارەی دۆخی ئێستای عێراق، پەیوەندییەکانی هەولێر و بەغدا، هەڵبژاردنی پەرلەمانی کوردستان، بڕیارەکانی دادگای فیدراڵی و چەند پرسێکی دیکە بڵاوکردەوە.

مەكتەبی سیاسی پارتی دیموكراتی كوردستان دەڵێت، "لایەنەکانی هاوپەیمانی ئیدارەی دەوڵەت دەخەینە بەردەم بەڕپرسیارێتیی نیشتمانی لە جێبەجێنەکردنی دەستوور و تەواوی خاڵەکانی رێککەوتنی سیاسی و ئیداریی پێکهێنانی کابینەی ئێستای حکومەتی عێراق بە سەرۆکایەتیی محەممەد شیاع سوودانی، بەپێچەوانەشەوە ناتوانین بەردەوام بین لە پڕۆسەی سیاسی دا".

مەكتەبی سیاسی پارتی ئاماژەی بەوەش کردووە، "لە سۆنگەی تێگەیشتنمان لە پێگە و بەرپرسیارێتی مێژووییمان لە پاراستنی مافە ڕەواكانی گەلی كوردستان و سیستەمی دیموكراسی و فيدراڵی عێراق، هەروەها ڕەوایی نەدان بە هەڵبژاردنێكی نا دەستووری و نا دیموكراسی، و وەستانەوە لە بەرامبەر سەرجەم ئەو پێشێلکاریانەی دەستوور کە لەلایەن دادگای باڵای فیدراڵییەوە بەرامبەر هەرێمی کوردستان و دامەزراوە دەستورییەکانی ئەنجام دەدرێت بەگشتی، و سەپاندنی هەموارە نادەستوریەكانی یاسای هەڵبژاردنی خولی شەشەمی پەرلەمانی کوردستان بەتایبەتی، بە بەرژەوەندی گەل و نیشتمانەکەمانی دەزانین كە پارتیمان نەچێتە ژێر باری پەسەندکردنی بریاری نادەستووریی و سیستەمێکی سەپێنراو لە دەرەوەی ئیرادەی گەلی هەرێمی كوردستان و دامەزراوە دەستوورییەکانی و بەشداری هەڵبژاردنێک نەكات کە بە نایاسایی و نادەستوری و لەسایەی سیستەمیکی سەپێنراودا بەڕێوەبچێت".