بارزان.. به‌ ئاماده‌بوونی مەلامستەفا بارزانی دیداری شانەدەر به‌ڕێوه‌چوو

به‌ گوێره‌ی راگه‌یه‌ندراوی ڕاگەیاندنی نووسینگەی مەلامستەفا بارزانی، ئەمڕۆ دووشەممە 20ـی ئایاری 2024 لە ئەشکەوتی شانەدەر لە دەڤەری بارزان، بەڕێز مەلامستەفا بارزانی بەشداری لە دیداری شانەدەر (shanidar platform)کرد، کە لەلایەن ئیدارەی سەربەخۆی سۆران و وەزارەتی شارەوانی و گەشت و گوزاری حکوومەتی هەرێمی کوردستان ڕێکخرابوو.

لە دیدارەکە هەریەکە لە ڕێبەر ئەحمەد وەزیری ناوخۆ، حەمە سەعید حەسەن وەزیری ڕۆشنبیری و ساسان عەونی وەزیری شارەوانی و گەشتوگوزار و فەریق سیهاد بارزانی و ژمارەیەک لە کونسولی وڵاتان و بەرپرسانی حکومی و حزبی و سەربازی و میوانانی بیانی و نێوخۆیی بەشداربوون.

لە دیدارەکەدا توێژەرانی بواری شوێنەوارزانی کە لە لایەن پرۆفیسۆر گرایم بارکەر لە زانکۆی کامبریجەوە سەرپەرشتی کراون، تیشکیان خستە سەر ئەنجامە نوێیەکانی ئەشکەوتی شانەدەر و چۆنیەتی دۆزینەوەی ئێسکەپەیکەری مرۆڤە نیاندەرتاڵییەکان و ئەو ئافرەتەی کە مێژووەکەی دەگەڕێتەوە بۆ 75 هەزار ساڵ بەر لە ئێستا کە لە ئەشکەوتی شانەدەر ژیاوە، ناونراوە شانەدەر Z.