لەسەر ڕاسپاردەی سەرۆکوەزیران مەسرور بارزانی پارکی ڕەشکین دروست دەکرێت

سەرۆکوەزیران مەسرور بارزانی
سەرۆکوەزیران مەسرور بارزانی

K24 – هەولێر:

لەسەر بودجەی تایبەتی نووسینگەی سەرۆکوەزیرانی هەرێمی کوردستان بە گوژمەی 15 ملیار دینار پارکی ڕەشکین لە شاری هەولێر دروست دەکرێت.

لەسەر ئەرک و ڕاسپاردەی مەسرور بارزانی، سەرۆکی حکوومەتی هەرێمی کوردستان و لەسەر بودجەی تایبەتی نووسینگەکەی، بە گوژمەی 15 ملیار دینار لەسەر ڕووبەری نزیکەی 120 هەزار مەتر دووجا و بە چاودێری و سەرپەرشتیی ڕاستەوخۆی وەزیری شارەوانی و گەشتوگوزار، پارکی ڕەشکین لە شاری هەولێر دروست دەکرێت.

هاوکات بە شێوەیەکی ڕاستەوخۆ، لێژنەیەک لەلایەن وەزیری شارەوانی ڕاسپێدراوە بۆ جێبەجێکردنی پڕۆژەی دروستکردنی پارکەکە، پڕۆژەکە لەم بەشانەی خوارەوە پێک دێت:

1- پەرژينى پڕۆژەكە بە درێژایی هەزار و 600 مەتر.

2-دروستكردنى گەراجى ئۆتۆمبێل .

3-دروستكردنى دوو كافترياى مۆدێرن.

4- دروستكردنى ڕێڕەوی ڕاکردن و پايسكلسواری.

5- دروستكردنى دوو عەمبارى ئاو بە قەبارەی 300 مەتر سێجا.

6- لێدانی بيرى ئاو بەقووڵی 500 مەتر.

7- كارى سيستمى كارەبا و سيستەمى ڕووناککەرەوەی پڕۆژەکە.

8- سەوزایی و چاندنی هەزار دار و چيمەنى هەميشە سەوز و دەیان هەزار گوڵ.

لەوبارەوە ساسان عەونی، وەزیری شارەوانی و گەشتوگوزار، لەمیانەی کۆنفڕانسێکی رۆژنامەوانیدا گوتی: لە قۆناغی یەکەمدا پڕۆژەکە بە بڕی 6 ملیار و 600 ملیۆن دینار جێبەجێ دەکرێت، هەروەها هەوڵدەدرێت لە ماوەی کەمتر لە ساڵێک پڕۆژەکە تەواو بکرێت.

وەزیری شارەوانی و گەشتوگوزار، ئاماژەی بەوەدا، ئەو بەڵێنەی سەرۆکوەزیران مەسرور بارزانی دووپات دەکەینەوە کە فەرموویەتی دەستی ئاوەدانی حکوومەت دەگەینینە هەموو شوێنەکان و داخوازییەکانی هاووڵاتییان جێبەجێ دەکەین.

گوتیشی: یەکێک لە بڕگەکانی کابینەی نۆیەمی حکوومەتی هەرێمی کوردستان بایەخدانە بە ژینگە و زیادکردنی رێژەی سەوزایی.

؛
؛
ک