سبەینێ پەرلەمانی عێراق دەنگ لەسەر درێژکردنەوەی تەمەنی کۆمیسیۆن دەدات

پەرلەمانی عێراق
پەرلەمانی عێراق

K24 – هەولێر:

سبه‌ینێ پەرلەمانی عێراق کۆدەبێتەوە و دەنگ لەسەر درێژكردنەوەی تەمەنی كۆمیسیۆنی باڵای هەڵبژاردنەكان دەدات.

فەرمانگەی ڕاگەیاندنی پەرلەمانی عێراق خشتەی دانیشتنی ڕۆژی چوارشەممەی پەرلەمانی بڵاو کردەوە. بەپێی خشتەكە، دەنگ لەسەر پێشنیازی هەمواریی دووەمی یاسای كۆمیسیۆنی هەڵبژاردنەكان دەدرێت، بەم جۆرە ماوه‌ی كاركردنی ئه‌نجوومه‌نی كۆمیسیاران بۆ شەش مانگی دیكە درێژ دەكرێتەوە.

هەروەها خاڵێکی دیکەی دانیشتنەکە پەیوەستە بە پڕۆژە یاسای گەڕاندنەوەی خاوەندارێتیی موڵک بۆ خاوەنەکانیان، ئەم بڕیارە پێشتر، لەلایەن ئەنجوومەنی سەرکردایەتیی بەعس دراوە؛ بە پەسەندکردنی ئەم یاسایە چاوەڕوان دەکرێت کێشەی موڵکداریی جووتیارانی کورد لە ناوچە کوردستانییەکانی دەرەوەی ئیدارەی هەرێم لە سنووری پارێزگای کەرکووک کۆتایی بێت.

هاوكات خوێندنەوەی یەكەم بۆ پێشنیازە یاسای هەمواریی یاسای دەستەی حەشدی شەعبی و پڕۆژەیاسای هەمواریی یەكەمی یاسای دامەزراوەی شەهیدان و خوێندنەوەی دووەمیش بۆ پڕۆژەیاسای دەزگای هەواڵگریی نیشتمانیی دەكرێت.