مەریوان قەرەنی: سەردانەکەی مەسرور بارزانی بۆ بەغدا زۆر گرنگە

ئەندامێکی پەرلەمانی عێراق، ڕایدەگەیێنێت، لەچوارچێوەی سەردانەکەی سەرۆکوەزیران بۆ بەغدا، ئەوبابەتانەی بڕیارە گفتوگۆی لەسەر بکرێت، ماددەی 140، ئابووری، مووچە و بودجەیە.

ئەمڕۆ پێنجشەممە، 30ـی ئایاری 2024، مەریوان قەرەنی، ئەندامی پەرلەمانی عێراق، بە کوردستان24ـی ڕاگەیاند، مەسرور بارزانی، سەرۆکی حکوومەتی هەرێمی کوردستان، لەگەڵ محەممەد شیاع سوودانی، لەسەر هەندێک بابەتی دەستووری کۆدەبێتەوە.

مەریوان قەرەنی، ئاماژەی بەوەشدا، لەچوارچێوەی سەردانەکەی سەرۆکوەزیران و ئەوبابەتانەی بڕیارە گفتوگۆی لەسەر بکرێت، ماددەی 140، ئابووری، مووچە و بودجەیە، واتە کاتێک  سەرۆکوەزیران سەردانی بەغدا دەکات بۆ بەدەستهێنانی دەستکەوت و کۆتایی هێنان بەکێشەیەکە.

ئەو پەرلەمانتارە باسی لەوەشکرد، دوێنێ سەرۆکی دەستەی ناوچە کوردستانییەکانی دەرەوەی ئیدارەی هەرێم بەشداری لە کۆبوونەوەی ئەنجوومەنی وەزیرانی عێراق کرد و ڕاپۆرتێکی سەبارەت بەو کێشانەی لە ناوچە کوردستانییەکان هەیە پێشکەش کرد.

دەشڵێت: بڕیارەکەی مەسرور بارزانی، سەرۆکی حکوومەت زۆر گرنگ بوو کە دوێنێ گوتی، " بەهیچ شێوەیە سازش لەسەر ماددەی 140 و ناوچە کوردستانییەکانی دەرەوەی ئیدارەی هەرێم ناکەین و دەبێت بگەڕێتەوە سەر هەرێمی کوردستان".

بەیانیی ئەمڕۆ پێنجشەممە، 30-05-2024، مەسرور بارزانی، سه‌رۆكى حکوومەتی هه‌رێمى كوردستان، بۆ کۆبوونەوە لەگەڵ محەممەد شیاع سوودانی، سەرۆکوەزیرانی فیدراڵ و بەرپرسانی دیکەی حکوومەتی فیدراڵ و سەرکردە و بەرپرسانی لایەنە سیاسییەکانی عێراق گەیشتە بەغدا.