مەسرور بارزانی بڕوای بەوە هەیە لەڕێگەی گفتوگۆوە ئەو دۆسییانەی چارە نەکراون، چارە بکرێن

باسی ڕۆژی کوردستان24 دەربارەی سەردانی سەرۆک وەزیران مەسرور بارزانی بۆ بەغدا
باسی ڕۆژی کوردستان24 دەربارەی سەردانی سەرۆک وەزیران مەسرور بارزانی بۆ بەغدا

پرسی سەردانی سەرۆکوەزیرانی هەرێمی کوردستان مەسرور بارزانی بۆ بەغدا، قسەو باسی خەڵک و چاودێرانی سیاسیی و هێز و لایەنەکانی عێراقە.

 پێنجشەممە، 30ـی ئایاری 2024، لە باسی ڕۆژی کوردستان24، ئەشواق جاف، ئەندامی کۆمیتەی ناوەندیی پارتی دیموکراتی کوردستان لەبارەی سەردانی سەرۆکوەزیران مەسرور بارزانی بۆ بەغدا گوتی، سەرۆکوەزیران مەسرور بارزانی بەردەوام کار لەسەر دەستپێشخەری دەکات، باوەڕی بەوە هەیە کە لەڕێگەی گفتوگۆوە و لەچوارچێوەی دەستووری عێراق، دەتوانین هەموو ئەو دۆسییانەی کە ماون و چارە نەکراون، چارە بکرێن.

دەشڵێت، بەردەوامی گفتوگۆ لەو قۆناغە زۆر گرنگە، چونکە لە چەند ڕۆژی داهاتوو دەنگ لەسەر پرۆژەی یاسای بودجە دەدرێت، هاوکات گفتوگۆ دەربارەی ناوچە کوردستانییەکان و یاسای نەوت و گاز دەکرێت.

ئەشواق جاف گوتی، سەرۆکوەزیران مەسرور بارزانی لەسەر سێ خاڵ کار دەکات، لە پرۆژەی چاکسازیی، گفتوگۆ لەسەر بنەمای دەستوور، بەهێزکردنی پەیوەندییە دیبلۆماسییەکان لەچوارچێوەی دەستوور.

هەروا گوتی، پێویستە لایەنەکانی هەرێمی کوردستان پشتیوانیی حکوومەتی هەرێمی کوردستان بکەن، چونکە ئەو گفتوگۆیانە و جێبەجێکردنی ئەو مافانە لە بەرژەوەندیی خەڵکی کوردستانە، پێویستە لەگەڵ هەنگاوە دەستوورییەکانی سەرۆکوەزیرانی کوردستان بن چونکە داکۆکی لە مافەکانی خەڵکی کوردستان دەکات.

دواتر شێخ حەیدەر لامی، سەرکردە لە دەوڵەتی یاسا، هەر لەبارەی سەردانەکەی سەرۆکوەزیرانی کوردستان مەسرور بارزانی بۆ بەغدا گوتی، سەردانی سەرۆکوەزیران مەسرور بارزانی بۆ بەغدا بووەتە بەشێک لە کارو کۆبوونەوەکانی سەرکردەکانی عێراق و هەرێمی کوردستان، ئەو سەردانە درێژەپێدەری کۆبوونەوەکانی پێشووترە، چەند خاڵێکی ناکۆکی و کۆک هەنە لە کارنامەی حکوومەت، هەندێکیان پێوستیان بە ستراتیجییەکی درێژ خایەنە.

شێخ حەیدە لامی گوتی، زۆر جوانە کە دەبینین مەسرور بارزانی هاتۆتە پێشەوە و سەردانی سەرکردە کاریگەرەکانی پرۆسەی سیاسیی عێراقی کردووە، ئەوە هەنگاوێکی زۆر ئەرێنیە، جیاوازە لە سیاسەتی پێشووی نێوان هەرێمی کوردستان و بەغدا.

پێشی وابوو، هەندێ لە کێشەکان پێویستیان بە کاری دوور و درێژە، بەتایبەت پرسی ناوچەکانی ماددەی 140 و مانەوەی یۆنامی، گوتی، پێویستە بەیەکەوە چارەیان بکەین.

لەبارەی مووچەی فەرمانبەرانی هەرێمی کوردستانیش، گوتی، هیچ کەسێک مافی ئەوەی نییە مووچەی خەڵکی کوردستان ببڕێت، ئێمە دژی دواخستنی ناردنی مووچەی فەرمانبەرانی کوردستانین.

لەبارەی دەستووریش ئاماژەی بەوە کرد، دەستوور چەتری هەمووانە، گوتی، دەمانەوێ ئەو وڵاتە بگەنینە کەناری ئارام، ئاماژەی بەوە کرد کە سەرۆکوەزیران مەسرور بارزانی چووەتە بەغدا بۆ ئەوەی کێشەکان چارە بکات و گوتی،  هەرێمی کوردستان سەری عێراقە، ئەگەر سەرەکە سەلامەت بێ، جەستەکە هەموو سەلامەت دەبێت.

پێی وابوو کە هەرێمی کوردستان بەشێکی گرنگیی عێراقە و نابێت کێشەیان لەگەڵ هەرێمی کوردستان هەبێت، گوتی، ئێمە ڕای جیاوازمان هەیە کە بەپێی دەستوور چارە دەکرێت.

پاشان، بەسما ئەوقاتی، شارەزای سیاسیی و مامۆستای زانکۆ لەبارەی سەردانی سەرۆکوەزیران مەسرور بارزانی بۆ بەغدا گوتی، سەردانەکەی سەرۆکوەزیران مەسرور بارزانی  دەستپێشخەرییەکی زۆر باشە کە سیاسییەکان لەگەڵ یەکتر کۆ ببنەوە، هیچ شتێک نابێتە ئەلتەرناتیڤی یەکتر بینین، گوتی، ئەو سەردانەی سەرۆکوەزیران مەسرور بارزانی دەربڕی لێکتێگەیشتنی زیاترە، ئاسوودەیی پێوە دیارە.

گوتی، پێویستە پشت بە دەستوور ببەسترێت، بۆ ئەوەی لە یەکتر تێبگەین و بە مافەکانمان بگەین، عێراق بە دۆخێکی خراپدا تێپەڕی، پێویستە پێکهاتەکان پەراوێز نەخرێن.

پێشی وابوو کە نابێت سەقامگیریی هەرێمی کوردستان هەڕەشەی لێ بکرێت، گوتی، پێویستە هەماهەنگی هەبێت بۆ چارەی کێشەکان، گوتیشی،  هەرێمی کوردستان سیاسەتی خۆی هەیە بۆ گەشەپێدانی کوردستان، عێراق چاوی لێ دەکاتەوە، هەرێمی کوردستان لایەنێکی زۆر گرنگە لە سەروەری عێراق، سەقامگیریی هەرێمی کوردستان بۆ عێراق گرنگە.