سەرۆکوەزیران مەسرور بارزانی پێشوازیی لە کونسوڵی گشتیی نوێی تورکیا کرد

پێشوازیی سەرۆکوەزیران مەسرور بارزانی  لە کونسوڵی گشتیی نوێی تورکیا
پێشوازیی سەرۆکوەزیران مەسرور بارزانی لە کونسوڵی گشتیی نوێی تورکیا

ئەمڕۆ دووشەممە، 10-06-2024، مەسرور بارزانی، سەرۆکی حکوومەتی هەرێمی کوردستان، پێشوازیی لە ئەرمان تۆپچو، کونسوڵی گشتیی نوێی تورکیا لە هەرێمی کوردستان کرد.

بە گوێرەی ڕاگەیەندراوی حکوومەتی هەرێمی کوردستان، سەرۆکوەزیران مەسرور بارزانی وێڕای پیرۆزبایی دەستبەکاربوونی، جەختی لە گرنگیی پەرەپێدانی پەیوەندی دوولایەنە لەسەر بنەمای بەرژەوەندی هاوبەش کردەوە.

لە بەشێکی دیکەی کۆبوونەوەکەدا، وەکو ئەوەی لە ڕاگەیەندراوەکەدا هاتووە: "سەرۆکی حکوومەت باسی لە گرنگیی جێبەجێکردنی پڕۆژەی ڕێگەی گەشەپێدان کرد کە عێراق و تورکیا و ئەورووپا لە ڕێگەی هێڵی ئاسنینەوە بەیەکەوە دەبەستێتەوە". ئاماژەشی بە پێویستیی بەشداربوونی هەرێمی کوردستان و هەموو پێکهاتەکانی عێراق لەو پرۆژە ستراتیجییەدا کرد.

کونسوڵی گشتیی تورکیا، خۆشحاڵی خۆی بە دەستبەکاربوونی لە هەرێمی کوردستان نیشاندا و خواستی وڵاتەکەی بۆ پەرەپێدانی زیاتری پەیوەندییەکان لەگەڵ هەرێمی کوردستان لە هەموو بوارەکاندا دووپاتکردەوە.

چارەکردنی کێشەکانی هەرێمی کوردستان و حکومەتی فیدراڵ و هەوڵەکانی دەستپێکردنەوەی هەناردەکردنی نەوتی هەرێمی کوردستان ، تەوەرێکی دیکەی گفتوگۆکان بوو.