پارتەکەی مونا قەهوەچی بەشداریی هەڵبژاردن دەکات

مونا قەهوەچی
مونا قەهوەچی

جێگری پارتی چاکسازیی تورکمان ڕایگەیاند، وەک نوێنەری پێکهاتەی تورکمان لە کۆمیسیۆنی باڵای سەربەخۆی هەڵبژاردنەکان، ناوی خۆمان بۆ هەڵبژاردنی پەرلەمانی کوردستان تۆمار کرد، لە پێناو زیاتر خزمەتکردنی هاووڵاتیانمان و پاراستنی قەوارەی دەستووریی هەرێمی کوردستان.

مونا قەهوەچی، جێگری پارتی چاکسازیی تورکمان، لە پلاتفۆرمی فەیسبوک ڕایگەیاند، سەڕەرای نیگەرانیەکانمان، وەک نوێنەری پێکهاتەی تورکمان لە کۆمیسیۆنی باڵای سەربەخۆی هەڵبژاردنەکان، ناوی خۆمان بۆ هەڵبژاردنی خولی شەشەمی پەرلەمانی کوردستان تۆمار کرد.

مونا قەهوەچی نووسیویەتی: پشتیوان بەخوای گەورە، پاشان سەرجەم هاووڵاتیانی ئازیزی کوردستان بە هەموو پێکهاتە جیاوازەکانەوە، سەرکەوتوو دەبین لەپێناو زیاتر خزمەتکردنی هاووڵاتیانمان و پاراستنی قەوارەی دەستووریی هەرێمی کوردستان.

پێشتر مونا قەهوەچی، جێگری سەرۆکی پارتی چاکسازیی تورکمان، لەمیانەی کۆنفرانسێکی ڕۆژنامەوانیدا گوتی: داواکارین کۆمیسیۆنی هەڵبژاردنەکانی عێراق پێداچوونەوەیەک بە بڕیارەکەی خۆی بکات و ژمارەی کورسیی بۆ پێکهاتەکان زیاد بکات و دابەشی سەر چەند بازنەیەکیان نەکات.

ئاماژەی بەوەش دابوو، پێویستە هەڵبژاردنێک بێتە کایەوە کە سەرجەم دامەزراوەکانی هەرێمی کوردستان پارێزراو بێت و سەرجەم پێکهاتەکانیش بەشداریی کارایان پێ بکرێت لە پەرلەمانی کوردستان. گوتیشی: هیچ دادپەروەرییەک لەو دابەشکرنەی کورسیی پێکهاتەکان نییە و لە هەوڵەکانمان بەردەوام دەبین و داوا لە کۆمیسیۆن دەکەین پێداچوونەوە بە بڕیاری دابەشکردنی کورسیی پێکهاتەکان بکاتەوە.

جەختی لەوەش کردەوە، بەشداریی لە هەڵبژاردنی خولی شەشەمی پەرلەمانی کوردستان دەکەن، بەو مەرجەی پێداچوونەوە بکرێت بە چۆنییەتی دابەشکردنی کورسیی پێکهاتەکان.

ڕۆژی سێشەممە (21ـی ئایاری 2024) دادگەی فیدراڵیی عێراق بڕیارەکەی دەستەی دادوەریی هەڵبژاردنەکانی پەسەند کرد، بەپێی دەقی بڕیارەکە پێنج کورسییەکەی پێکهاتەکان بەسەر پارێزگاکانی هەولێر، سلێمانی و دهۆک دابەش دەکرێن.

پێشتر دادگەی فیدراڵیی  بڕیاردا بوو ژمارەی کورسییەکانی پەرلەمانی کوردستان بۆ 100 کورسی کەم بکاتەوە، کۆمیسیۆنی باڵای سەربەخۆی هەڵبژاردنەکانی عێراقیش، بە بشتبەستن بەو بڕیارە کورسییەکانی بەم شێوەیە بەسەر پارێزگاکانی هەرێمی کورستاندا دابەش کردبوو: هەولێر، 34 کورسی، سلێمانی 38، دهۆک 25 و هەڵەبجەش سێ کورسی.