کەشناسی عێراق: سبەینێ حەوت پارێزگا نزیک دەبنەوە لە پلەی کوڵان

کەشوهەوا
کەشوهەوا

دەستەی کەشناسی عێراق پێشبینییەکانی بۆ دۆخی کەشوهەوای پێشبینیکراوی ڕۆژانی داهاتووی بڵاوکردەوە و ئاماژەیداوە، پلەکانی گەرما لە حەوت پارێزگا بە ڕێژەیەک بەرز دەبنەوە و لە پلەی کوڵان نزیک دەبێتەوە.

بە گوێرەی پێشبینییەکان، کەشوهەوای سبەینێ هەینی گەرم و ئاسمانیش پەڵە هەور دەبێت، دۆخی کەشوهەوای ناوچەکانی ناوەڕاست و باشوور لەیەک نزیک دەبن و پلەی گەرمای پارێزگاکانی بەغدا، بابل، میسان، نەجەف، زیقار، موسەننا و بەسرە نزیک دەبێت لە پلەکانی کوڵان، بەڵام  پلەکانی گەرما لە هەرێمی کوردستان تاڕادەیەک بەرز دەبێتەوە.

هەروەها ئاماژەیداوە، کەشی پێشبینیکراوی شەممە و یەکشەممەی داهاتوو گەرم و ئاسمان نیمچە هەور دەبێت، بەڵام دووشەممەی هەفتەی داهاتوو پلەکانی گەرما لە هەرێمی کوردستان و ناوەڕاستی عێراق کەمێک دادەبەزن و لە باشووری عێراقیش لەگەڵ بەرزی پلەکانی گەرما، کەمێک خۆڵبارین دەبێت.