شاخەوان عەبدوڵڵا: سوودانی بەڵێنی داوە کێشەی مووچەی پیشمەرگە و هێزە ئەمنیەکان چارە بکات

شاخەوان عەبدوڵڵا، جێگری سەرۆکی پەرلەمانی عێراق
شاخەوان عەبدوڵڵا، جێگری سەرۆکی پەرلەمانی عێراق

سەرۆکوەزیرانی عێراق و جێگری سەرۆکی پەرلەمان دواکەوتنی مووچەی پێشمەرگە و هێزە ئەمنییەکانیان تاوتوێ کرد، سوودانی بەڵێنی دا کێشەی مووچەی پێشمەرگە و هێزە ئەمنییەکان چارە بکات.

د. شاخەوان عەبدوڵڵا، جێگری سەرۆکی پەرلەمانی عێراق بە کوردستان24ـی راگەیاند، ئەمرۆ چوارشەممە، 10ـی تەمموزی 2024،  لەگەڵ محەممەد شیاع سوودانی، سەرۆکوەزیرانی عێراق بۆ تاوتوێکردنی کۆمەڵێک پرس کۆبوونەتەوە، لەنێویاندا چارەکردنی کێشەی نەناردنی مووچەی هێزەکانی پێشمەرگە و هێزەئەمنییەکان.

شاخەوان عەبدوڵڵا گوتیشی: داوایان لەسەرۆکوەزیران کردووە، ئەو ناوانەی لە لیستی هێزەئەمنییەکان کێشەیان تێدایە، جێ بهێلدرێن بۆ دیوانی چاودێریی دارایی تاوەکو وردبینی تێدا بکات و ئەو ناوانەشی کە وردبینی تێیدا کۆتایی هاتووە و کێشەی نییە، مووچەکانیان خەرج بکرێت.

جێگری سەرۆکی پەرلەمانی عیراق ئاماژەی بەوەش دا، سەرۆکوەزیرانی عێراق بەڵێنی داوە لەماوەی چەند ڕۆژی داهاتوودا کێشەی مووچەی هێزە ئەمنیەکان چارە بکرێت و مووچەکانیان ڕەوانە دەکرێت.