داهاتی دانە گاز لە کێڵگەی کۆرمۆر زیادی کردووە

کۆمپانیای دانە گاز ڕایدەگەیەنێت، ڕێژەی قازانجیان لە چارەکی دووەمی ئەمساڵ لە کێڵگەی کۆرمۆر سەدا سێ زیادی کردووە.

کۆمپانیای دانە گازی ئیماراتی کە سەرپەرشتیی دەرهێنان و هەناردەی گازی کێڵگەی کۆرمۆری هەرێمی کوردستان دەکات؛ لە ڕاگەیەندراوێکدا ئاشکرای کرد، ڕێژەی قازانجیان لە چارەکی دووەمی ئەمساڵ لە کێڵگەی کۆرمۆر لە سەدا سێ زیادی کردووە. بە جۆرێک، بەراورد بە ساڵی ڕابردوو داهاتیان 34 ملیۆن دۆلار زیادی کردووە.

دانە گاز لە ڕاگەیەندراوەکەیدا باسی لەوەش کردووە، سەرباری بەرهەمهێنانی گاز، ئاستی بەرهەمهێنانی نەوتیان لە هەرێمی کوردستان گەیشتووەتە 37 هەزار بەرمیل نەوتی ڕۆژانە.

دانە گاز جەختیش لەوە دەکاتەوە، هەر چەندە چەندان جار لە هەرێمی کوردستان هێرشیان کراوەتە سەر، بەڵام بەردەوامن لە تەواوکردنی پرۆژەی 'کۆرمۆر 250' لە کێڵگەی کۆرمۆری هەرێمی کوردستان.