نیاز نەقشبەندی: کارەکانی زیاتر لە 94 کۆمپانیای حەج و عومرە ڕاگیراون
K24 – هەولێر:
بەڕێوەبەری گشتیی بەڕێوەبەرایەتیی حەج و عومرەی هەرێمی کوردستان، ڕایگەیاند: لەسەر ڕاسپاردەی سەرۆکوەزیران مەسرور بارزانی لێژنەیەک بۆ لێکۆڵینەوە لە کۆمپانیا وەهمییەکانی حەج و عومرە پێک هێنراوە.
نیاز نەقشبەندی، بەڕێوەبەری گشتیی بەڕێوەبەرایەتیی حەج و عومرەی هەرێمی کوردستان، بە کوردستان24ـی ڕاگەیاند: زیاتر لە 94 کۆمپانیا لە هەرێمی کوردستان بە تۆمەتی کۆمپانیای وەهمی کارەکانیان ڕاگیراون.
گوتیشی: لەسەر ڕاسپاردەی سەرۆکوەزیران مەسرور بارزانی لیژنەیەک بۆ لێکۆڵینەوە لە کۆمپانیا وەهمییەکانی حەج و عومرە پێک هێنراوە.
باسی لەوەش کرد: ئەوەی لە بەرژەوەندی هاووڵاتییاندا بێت دەیکەن. بەڕێوەبەری گشتیی بەڕێوەبەرایەتیی حەج و عومرەی هەرێمی کوردستان، دەڵێت: ئەو کۆمپانیایانەی کە ڕاگیراون دۆسیەکانیان لە دادگایە.
ماوەی نزیکەی سآڵێکە هەندێک کەس و کۆمپانیا کە تۆمار نەکراون و گریبەستی فەرمیان نییە، هەوڵ دەدەن بە شێوەیەکی نایاسایی هەوڵاتییانی هەرێمی کوردستان لە باشوور و ناوەراستی عێراق ببەن بۆ عومرە، هەندێک جاریش فێڵ لە هاووڵاتییان دەکەن، گوتەبێژی بەرێوبەرایەتی حەج و عەمرەش داوا لە هاووڵاتییان دەکات تەنیا گەشت لەگەڵ کۆمپانیای فەرمیدا بکەن.