پێکهاتەکان داوا دەکەن نوێنەریان لە کۆمیسیۆنی هەڵبژاردنەکانی عێراق هەبێت

وەزیری هەرێم بۆ کاروباری پێکهاتەکان داوا دەکات؛ تورکمان، کلدان، سریان و پێکهاتەکانی دیکە نوێنەریان لەنێو کۆمیسیۆنی باڵای سەربەخۆی هەڵبژاردنەکانی عێراق هەبێت. دەشڵێت، مافی تورکمانەکانی کەرکووک پێشێل کراوە.

پێنجشەممە، 15-08-2024، ئایدن مەعروف، وەزیری هەرێم بۆ کاروباری پێکهاتەکان لە حکوومەتی هەرێمی کوردستان لە کۆنفرانسێکی ڕۆژنامەوانیدا ڕایگەیاند: پێکهاتەکان بە سیستەمی کۆتا و لە دەرەوەی سیستەمی کۆتاش بەشداریی هەڵبژاردنی پەرلەمانی کوردستان دەکەن.

ئایدن مەعروف بە پێویستی دەزانێت، دوای تەواوبوونی هەڵبژاردنی ئەمجارەی پەرلەمانی کوردستان، گۆڕان لە یاسای هەڵبژاردن بکرێت و ژمارەی کورسیی کۆتا لە پێنج کورسییەوە بۆ 15 کورسی زیاد بکرێن.

وەزیری هەرێم بۆ کاروباری پێکهاتەکان داوا دەکات تورکمان، کلدان، سریان و پێکهاتەکانی دیکە نوێنەریان لەنێو کۆمیسیۆنی باڵای سەربەخۆی هەڵبژاردنەکانی عێراق هەبێت و لە بەڕێوەبردنی کارەکانی تایبەت بە هەڵبژاردنی پەرلەمانی کوردستان ڕۆڵیان هەبێت.

لەبارەی هەڵبژاردنی پارێزگار و سەرۆکی ئەنجوومەنی پارێزگای کەرکووکیش، وەزیری هەرێم بۆ کاروباری پێکهاتەکان پێیوایە، مافی تورکمانەکانی کەرکووک لەو پرسەدا پێشێل کراوە و دەڵێت: دەبووایە پێکهێنانی حکوومەتی خۆجێیی کەرکووک بە ڕێککەوتن بووایە، نەک مافی هەندێک پێکهاتە پێشێل بکرێت. ئەوەی ڕوویدا نایاسایی بوو.

هەڵبژاردنی خولی شەشەمی پەرلەمانی کوردستان، ڕۆژی 20-10-2024، بە سەرپەرشتیی کۆمیسیۆنی باڵای سەربەخۆی هەڵبژاردنەکانی عێراق بەڕێوە دەچێت. 

کۆی گشتیی ژمارەی کورسییەکانی پەرلەمانی کوردستان، 100 کورسین؛ 95ـیان گشتین و پێنجیشیان بۆ کۆتا تەرخان کراون. دابەشکارییەکەش بەم شێوەیەی خوارەوەیە:

دابەشکاریی ژمارەی کورسییە گشتییەکانی پەرلەمانی کوردستان بەسەر پارێزگاکاندا:

1.  هەولێر: 32 کورسی

2.  سلێمانی: 36 کورسی

3.  دهۆک: 24 کورسی

4.  هەڵەبجە: سێ کورسی

(کۆی گشتی: 95 کورسی)

دابەشکاریی ژمارەی کورسیی کۆتای پەرلەمانی کوردستان بەسەر پارێزگاکاندا:

1.  هەولێر: دوو کورسی

2.  سلێمانی: دوو کورسی

3.  دهۆک: یەک کورسی

4.  هەڵەبجە: سفر کورسی

(کۆی گشتی: 5 کورسی)

کۆی گشتیی ژمارەی دەنگدەران بۆ هەڵبژاردنی پەرلەمانی کوردستان، دوو ملیۆن و 899 هەزار و 878 کەسە؛ لەو ژمارەیە دوو ملیۆن و 683 و 618ـیان دەنگدەری گشتین و 215 هەزار و 960ـیشیان دەنگدەری تایبەتن.  

بۆ هەڵبژاردنی گشتیی پەرلەمانی کوردستان، هەزار و 266 ناوەند و شەش هەزار و 318 بنکەی دەنگدان ئامادە کراون؛ بۆ هەڵبژاردنی تایبەت، کە هێزە ئەمنییەکان دەگرێتەوە، 165 ناوەند و 749 بنکەی دەنگدان لە سنووری هەر چوار پارێزگای هەولێر، سلێمانی، دهۆک و هەڵەبجە ئامادە کراون.