مەسرور بارزانی: هەندێک لایەن دژایەتیی هەوڵەکانی ڕووبەڕووبوونەوەی گەندەڵییان کردووە
سەرۆکوەزیران مەسرور بارزانی دەڵێت، هەندێک لایەنی سیاسیی هەرێمی کوردستان، "دژایەتیی سیستەماتیکی هەوڵەکانی حکوومەتەیان بۆ ڕووبەڕووبوونەوەی گەندەڵی کردووە".
چوارشەممە، 04-09-2024، مەسرور بارزانی، سەرۆکی حکوومەتی هەرێمی کوردستان، لە ڕێورەسمی ڕاگەیاندنی یەکەمین ڕاپۆرتی ستراتیجیی ڕووبەڕووبوونەوەی گەندەڵی؛ لە گوتارێکدا باسی لە هەوڵەکانی حکوومەت بۆ ڕووبەڕووبوونەوەی گەندەڵی و ئەو لایەنانە کرد کە بەربەست لە بەردەم هەوڵەکانی حکوومەت بۆ ئەو مەبەستە دروست دەکەن.
بە گوتەی سەرۆکوەزیران، "ئێمە خواست و ئیرادەیەکی بەهێزمان بۆ ڕووبەڕووبوونەوە و بەرەنگاربوونەوەی گەندەڵی هەیە، بەڵام ئەمە تەنیا ئەرکی حکوومەت و دادگاکان نییە، بەڵکوو پێویستی بە هەماهەنگیی و هاریکاری و پشتیوانیی گشت هاووڵاتییان و هەموو چین و توێژەکانی کۆمەڵگە و زانکۆ و دامەزراوەکانی پەروەردە و مامۆستایانی ئایینی و دەزگاکانی ڕاگەیاندن هەیە کە دەتوانن ڕۆڵێکی گرنگ و کاریگەر لە هوشیارکردنەوەی کۆمەڵگە و ڕوونکردنەوەی مەترسییەکانی گەندەڵی بگێڕن".
سەرۆکوەزیران مەسرور بارزانی بە پێویستی دەزانێت، حکوومەت، دادگاکان و هەموو چین و توێژەکانی کۆمەڵگە، "پێکەوە کار لەسەر پەرەپێدان و بڵاوکردنەوەی کولتووری دەستپاکی و ڕاستگۆیی و دڵسۆزیی بکەین"
وەکو ئەوەی مەسرور بارزانی باسی کرد، "هەرچەندە بەشێک لە گرفتەکانی ڕووبەڕووبوونەوەی گەندەڵی و بەرنامەی چاکسازی، دەست تێوەردان و ڕۆڵی لایەنە سیاسییەکان بووە کە نەک هاوکار نەبوون، بەڵکوو هەندێک لایەن دژایەتی سیستەماتیکی هەوڵەکانی حکوومەتەیان کردووە".
سەرۆکی حکوومەت، هاووڵاتییانی هەرێمی کوردستانی دڵنیا کردەوە، "سەرەڕای هەموو کێشە و ئاستەنگ و قەیرانەکان، ئێمە بە گوڕ و تین و ئیرادەیەکی زۆر بەهێزەوە، بەردەوام دەبین لە سەر درێژەدان بە کارنامەی چاکسازی و بەرەنگاربوونەوەی گەندەڵی و نەهێشتن و ڕێگریکردن لە بەهەدەردانی سامانی گشتی".
سەرۆکوەزیران مەسرور بارزانی باسی لەوەش کرد، "ڕووبەڕووبوونەوەی گەندەڵی و سنووردانان بۆ بەهەدەردانانی سامانی گشتی، بەشێکی گرنگی کارنامەی کابینەی نۆیەمی حکوومەتی هەرێمی کوردستان بووە، بۆیە کاری جددیمان کردووە و ڕێکاری پێویستیمان گرتەبەر لە پێناو پەرەپێدانی شەفافییەت و ڕووبەڕووبوونەوەی گەندەڵی".
دەقی گوتاری سەرۆکوەزیران مەسرور بارزانی لەم بەستەرەدا بخوێنەوە
