وەزارەتی پێشمەرگە لەبارەی هاوکارییە داراییەکانی هاوپەیمانان ڕوونکردنەوە دەدات
K24 – هەولێر:
وەزارەتی پێشمەرگە ڕایگەیاند، گرفتی پێنەدانی هاوکارییە داراییەکانی هاوپەیمانان بۆ بەشێک لە هێزەکانی پێشمەرگە هیچ پەیوەندی بڕیارەکانی وەزارەتی پێشمەرگەوە نییە.
چوارشەممە 4ـی ئەیلوولی 2024 وەزارەتی پێشمەرگە لە میانەی ڕاگەیاندراوێکدا ڕوونی کردووەتەوە، گرفتی پێنەدانی هاوکارییە داراییەکانی هاوپەیمانان بۆ بەشێک لە هێزەکانی پێشمەرگە هیچ پەیوەندی بە بڕیارەکانی وەزارەتەوە نییە، بەڵکو ڕاستەوخۆ پەیوەندیدارە بەشێوازی کارکردن و پێدانی هاوکاری هاوپەیمانان بەیەکە سەربازییەکان.
وەزارەتەکە دەڵێت: گرفتی ئەم یەکە سەربازیانەش کە پەیوەستە بە هەبوونی ڕۆتینێکی ئەمنی هێزەکانی هاوپەیمانان، لەم بارەیەشەوە وەزارەتی پێشمەرگە هەنگاوی پێویستی ناوە و کاری جیددی لەسەر کردووە.
وەزارەتی پێشمەرگە ڕایگەیاند، چاوەڕوانی بڕیاری هاوپەیمانان دەکەن بۆ ڕێکخستنەوە و چۆنیەتی دابەشکردنی هاوکاریەکان بۆ یەکەکانی سەر بەوەزارەتی پێشمەرگە.