ناوی مێسی و رۆناڵدۆ لە لیستی بەربژێرانی باڵۆن دۆر نییە
ناوی بەربژێرانی خەڵاتی باڵۆندۆری 2024ی بڵاوکرایەوە و یەکەمجارە لە دوای ساڵی 2003ـەوە ناوی مێسی و رۆناڵدۆ لە لیستەکەدا نییە.
گۆڤاری فرانس فوتبۆڵ ناوی 30 یاریزانی وەك بەربژێری خەڵاتی باڵۆن دۆر بڵاوکردەوە و ئەمساڵ هەشت خەڵاتی جیاواز بەسەر باشترینەکان دابەشدەکەن.
خەڵاتی باشترینەکانی ساڵی 2024 جیاوازە و یەکەمجارە باشترین راهێنەری تۆپی پێی پیاوان و ئافرەتان هەڵدەبژێردرێن.
لەسەر ئاستی پیاوان هەریەکە لە ( دیلافیۆنتی راهێنەری ئیسپانیا، ئانچێلۆتی راهێنەری ریاڵ مەدرید، ئالۆنسۆ راهێنەری بایەرلیڤەرکوزن، گاسپرینی راهێنەری ئاتالانتا، سکالۆنی راهێنەری ئەرجەنتین و گواردیۆلای راهێنەری مان سیتی) کێبڕکێی باشترین راهێنەرانی ساڵی 2024 دەکەن.
چەند گۆڵپارێزێکیش کێبڕکێی باشترینی ساڵی 2024 دەکەن کە دیارترینیان (مارتینێزی گۆڵپارێزی ئاستۆن ڤیلا، لونینی گۆڵپاریزی ریاڵ مەدید، سومەری گۆڵپارێزی ئینتەرمیلان و دونا رۆمای گۆڵپارێزی پاریس سانجێرمان)ن.
گۆڤارەکە ناوی بەربژێرانی باشترین یاریزانی لاوی بڵاوکردەوە و هەریەك لە یاریزانان ( یامال، گولەر، ساڤینیۆ، کوباسی و ماینوو) بەهێزترین بەربژێری بردنەوەی خەڵاتەکەن.
بەربژێرەکانی باشترینی ساڵی 2024 یانەکانیش دەگرێتەوە و (ریاڵ مەدرید و جیرۆنای ئیسپانی، مانچێستەر سیتی ئینگلیزی، بۆرووسیا دۆرتمۆند و بایەرلیڤەرکوزنی ئەڵمانی) شەڕی باشترین یانەی ساڵ دەکەن.
چەند ئامارێكی سەرنجڕاکێش لەسەر باڵۆن دۆری 2024:
- یەکەمجارە لە ساڵی 2003ـەوە ناوی مێسی و رۆناڵدۆ لە لیستی بەربژێرانی باڵۆندۆر نییە.
- یەکەمجارە لە ساڵی 2014ـەوە ناوی دیبرۆین لە لیستی بەربژێرانی باڵۆن دۆر نییە.
- 10 یاریزانی پرێمەرلیگ ناوی لە لیستی خەڵاتی باڵۆن دۆری ئەمساڵە.
- ریاڵ مەدرید خاوەنی زۆرتری یاریزانی بەربژێری باڵۆندۆرە بە 7 یاریزان.
رۆژی 28ی مانگی 10 گۆڤاری فرانس فوتبۆڵ و فیدراسیۆنی تۆپی پێی ئەوروپا بۆ یەکەمجار بە هاوبەشی لە پاریس خەڵاتەکان دابەشدەکەن.