زانکۆلاین بۆ ماوەی 24 کاتژمێر درێژ کرایەوە
K24 - هەولێر:
وەزارەتی خوێندنی باڵا ڕایگەیاند: لەپێناو دەرفەتی زیاتر بۆ ئەوانەی فۆڕمی زانکۆلاینییان پڕ نەکردووەتەوە، ماوەی پیشکەشکردن لە سیستەمەکە بۆ 24 کاتژمێری دیکە درێژ کرایەوە.
شەممە 5ـی تشرینی یەکەمی 2024 وەزارەتی خوێندنی باڵا و توێژینەوەی زانستی لە ڕاگەیەندراوێکدا ئاماژەی بەوە دا، لەپێناو پێدانى دەرفەتى زیاتر بە دەرچووانى پۆلی 12ـی ئامادەیی، کە تا ئێستا فۆڕمى زانکۆلاینییان پڕنەکردووەتەوە یان تەواویان نەکردووە بەتایبەت دەرچووانى 12ـی ئامادەیی لە کەرکووک، شنگال و خانەقین، بڕیاردرا ماوەى زانکۆلاین 24 کاتژمێری دیکە درێژ بکرێتەوە.
وەزارەتەکە ڕایگەیاند، سیستەمی زانکۆلاین تا کاتژمێر 12ـی شەوی یەکشەممە لەسەر دووشەممە وەک دوا دەرفەت بۆ دەرچووانی پۆلی 12ـی ئامادەیی درێژ کراوەتەوە.
لە ڕاگەیەندراوەکەدا جەخت لەوە کراوەتەوە، کە ئەمە دواین دەرفەتە و چیدیکە ماوەى زانکۆلاین درێژ ناکرێتەوە. هاوکات وەزارەتەکە داوا لە دەرچووانی پۆلی 12ـی ئامادەیی دەکات، ئەوانەی کە تا ئێستا فۆڕمەکەیان پڕنەکردووەتەوە، پێویستە لەماوەى ئەو 24 کاتژمێردا پەلە بکەن و تەواوى هەوڵەکانیان بخەنە گەڕ بۆ پڕکردنەوە و تەواوکردنى فۆرمى زانکۆلاین.
دووشەممە 30ـی ئەیلوولی 2024 وەزارەتى خوێندنى باڵا و توێژینەوەى زانستى لە ڕاگەیەندراوێکدا ڕایگەیاند: لە پێناو پێدانى دەرفەتى زیاتر بە دەرچووانى 12ـی ئامادەیى بۆ ئەوانەى تاوەکوو ئێستا فۆرمى (زانکۆلاین)ـیان پڕ نەکردووەتەوە یان تەواویان نەکردووە، بڕیاردرا ماوەى زانکۆلاین بۆ پێنج ڕۆژى دیکە واتە تاوەکوو کاتژمێر 12:00ـی شەوى شەممە لەسەر یەکشەممە ڕێکەوتى (2024/10/5) بۆ دەرچووانى پۆلی 12ـی ئامادەیی درێژ بکرێتەوە.
هەینی 20ـی ئەیلوولی 2024 وەزارەتی خوێندنی باڵا و توێژینەوەی زانستی حکوومەتی هەرێمی کوردستان، ڕایگەیاند: پرۆسه‌ی پێشکەشکردن بۆ وه‌رگرتنی ده‌رچووانی پۆلی 12 ئاماده‌یی له زانكۆكانی هەرێمی كوردستان دەست پێدەکات و لە ڕۆژی شەممەوە ڕێکەوتى 21ـی ئەیلوولی 2024 سەعات 12ـی نیوەڕۆ، زانكۆلاین بۆ ماوەى (10) ڕۆژ کارە دەکرێت.