بارزانى: شه‌رمه‌زارى بۆ ئه‌وانه‌ ده‌مێنێته‌وه‌ ئاڵاى كوردستان ده‌سووتێنن

مه‌سعوود بارزانى، سه‌رۆكى هه‌رێمى كوردستان له‌ راگه‌يه‌ندراوێكدا سوپاس و پێزانينى خۆى ئاراسته‌ى خه‌ڵكى شارى عاموودا كرد

K24 – هه‌ولێر:

مه‌سعوود بارزانى، سه‌رۆكى هه‌رێمى كوردستان له‌ راگه‌يه‌ندراوێكدا سوپاس و پێزانينى خۆى ئاراسته‌ى خه‌ڵكى شارى عاموودا كرد و رايگه‌ياند،  دەستخۆشیتان لێ دەكەم كە بە پشوودرێژی و بەرخودانتان ئاڵای كوردستان دەپارێزن كە ئاڵای خوێنی شەهیدان و هێمای پێكەوەژیان و ئاشتیخوازییە.

له‌ راگه‌يه‌ندراوه‌كه‌يدا، كه‌ له‌ ماڵپه‌ڕى سه‌رۆكايه‌تى هه‌رێمى كوردستان بڵاوكراوه‌ته‌وه‌، سه‌رۆكى هه‌رێمى كوردستان جه‌ختى له‌سه‌ر ئه‌وه‌ كردووه‌ته‌وه‌، كه‌ شەرمەزاری بۆ ئەوانە دەمێنێتەوە كە ئاڵای كوردستان دەسووتێنن و گەنج و لاوی كورد ئەشكەنجە و ئازار دەدەن و، دواجار باجی ئەو تاوانانەیان هەر دەدەن.

جێى ئاماژه‌يه‌، دوێنى له‌ شارى قاميشلۆ مانگرتنێك له‌ دژى ده‌ستگيركردنى ئه‌ندام و به‌رپرسانى ئه‌نه‌كه‌سه‌ ئه‌نجامدراو و رێكخستنى گه‌نجانى شۆرشگێڕى سه‌ر به‌ پارتى يه‌كێتى ديموكراتى ناسراو به‌ په‌يه‌ده‌، هێرشيان كرده‌ سه‌ر گردبوونه‌وه‌ى مانگرتووه‌كان و له‌ ئه‌نجامدا 5 هاووڵاتى بريندار بوون.

هه‌روه‌ها شه‌وى رابردوو، هێرشكرايه‌ سه‌ر باره‌گاى نووسينگه‌ى خۆجێى ئه‌نه‌كه‌سه‌ له‌ شارۆچكه‌ى عاموودا و ئاڵاى كوردستان خرايه‌ خواره‌وه‌ و سووتێندرا و سووكايه‌تى به‌ سيمبووڵه‌كانى نه‌ته‌وه‌يى كورد كران.

ده‌قى راگه‌يه‌ندراوه‌كه‌ى سه‌رۆكى هه‌رێمى كوردستان:

بەناوی خودای بەخشندە و میهرەبان

سوپاس و پێزانینی خۆم ئاراستەی خەڵكی خۆڕاگری شاری عامودا دەكەم، كە بەرگریكاری ڕەسەنایەتی و نیشتیمانپەروەری و بەها بەرزەكانی گەلی كوردستانن. دەستخۆشیتان لێ دەكەم كە بە پشوودرێژی و بەرخودانتان ئاڵای كوردستان دەپارێزن كە ئاڵای خوێنی شەهیدان و هێمای پێكەوەژیان و ئاشتیخوازییە.

لەوە دڵنیاتان دەكەمەوە كە ڕێچكەی نیشتیمانپەروەری و گیانی كوردایەتی و ڕەسەنایەتی سەردەكەوێت و شەرمەزاری بۆ ئەوانە دەمێنێتەوە كە ئاڵای كوردستان دەسووتێنن و گەنج و لاوی كورد ئەشكەنجە و ئازار دەدەن و، دواجار باجی ئەو تاوانانەیان هەر دەدەن.

مسعود بارزانی

3ـی 12ـی 2016