ئاوارەكانی ئەنبار لەكوردستانەوە بەرەو زێدی خۆیان دەگەڕێنەوە

K24 - ھەریر

زۆربەی ئاوارەکانی پارێزگای ئەنبار کە بە ھۆی ھێرشەکانی داعشەوە زێدی خۆیان بە جێھێشت و روویان لە ھەرێمی  کوردستان کرد، دەگەرێنەوە ناوچەکانی خۆیان.

عالیە عەدنان، یەكێكە لەو ئاوارانەی لەگەڵ ھاتنی داعش بۆ پارێزگای ئەنبار لەگەڵ خێزانەكەی روویان كردووەتە ھەرێمی كوردستان، ئەوان ئێستا كەلوپەلی ماڵەكەیان دەپێچنەوە و بەرەو زێدی خۆیان دەگەڕێنەوە، عالیە بە كوردستان24 گوت: "كاتێك كە ئاوارەبووین نەیان ھێشت ھیچ لەگەڵ خۆمان بھێنین تەنھا جلمان ھێنا و ئینجا بە ھەزار حاڵ رێگایان بۆ كردینەوە، من ئێستا دەگەڕێمەوە، بەڵام زۆر بێتاقەتم چونكە لێرە راھاتووین و دراوسێمان ھەیە و خۆشمان دەوێن بیریان دەكەین".

ئاوارەیەكی دیكەی خەڵكی فەللوجە بەناوی عەبوودی والی كە زیاتر لە دووساڵ لە ناحیەی ھەریر نیشتەجێبوو دەڵێ: "مامەڵەی  کوردەکان زۆر باشە لەگەڵ ئێمە زۆر رێزمان لێدەگرن و نرخمان دەزانن سوپاسی مەسعوود بارزانی و گەلەکەی و سوپاکەی دەکەین".

 سەباح عەلوان ئاوارەیەكی خەڵكی فەللوجەیە لەكاتی باركردنی ماڵەكەی بە پەرۆشەوە باس لە جێھشتنی كوردستان دەكات و دەڵێت: "کاتێک دەگەڕێینەوە شاری خۆمان ئێمە یادگاری خۆمان کە لە ماوەی سێ ساڵدا لە کوردستان تۆمارمان کردووە لەگەڵ خۆمان دەیبەین کە چەندە خەڵکێکی باش بوون و یارمەتییان داوین بەتایبەتی خەڵکی حەریر کە میواندارییەکی باشیان کردووین و قەت ئازاریان نەداوین خودا پاداشتی ئەوان و حکوومەتی ھەرێمی کوردستان بداتەوە".