گۆڕان گفتوگۆ لەگەڵ شاندی پارتی تاوتوێ دەكات
K24 – ھەولێر
بزووتنەوەی گۆڕان لەبارەی كۆبوونەوەیان لەگەڵ شاندی پارتی دیموكراتی كوردستان كۆدەبێتەوە.
بڕیارە ئەمڕۆ جڤاتی نیشتمانی بزووتنەوەی گۆڕان لە سلێمانی کۆببێتەوە و گفتوگۆ لەسەر پێشنیاز و بۆچوونەكانیان بكەن دەربارەی کۆبوونەوەیان لەگەڵ شاندی پارتی دیموکراتی کوردستان كە بڕیارە لەم ھەفتەیەدا شاندی پارتی لە سلێمانی لەگەڵ شاندی گۆڕان و یەكێتی لەبارەی پەیامەكەی مەسعوود بارزانی سەرۆكی ھەرێمی كوردستان وەك دەستپێشخەری بۆ چارەسەری كێشەناوخۆییەكان كۆببێتەوە.
بە گوێرەی زانیارییەكان لە كۆبوونەوەی ئەمڕۆدا بزووتنەوەی گۆڕان پاكێجێك بۆ چارەسەركردنی كێشەكان و گفتوگۆكردن لەگەڵ شاندی پارتی دیموكراتی كوردستان ئامادە دەكات و بۆچوونی بزووتنەوەكە لەبارەی گۆڕانكارییەكان لە دامەزراوەكانی ھەرێمی كوردستان لەو پاكێجەدا دەخاتەڕوو.
لە 20/11/2016، مەسعوود بارزانی سەرۆکی ھەرێمی کوردستان لە پەیامێکیدا بۆ لایەنە سیاسییەکانی باشووری کوردستان، داوای کرد لایەنە سیاسییەکان بۆ چارەسەرکردنی کێشەناوخۆییەکانی گفتوگۆ بکەن، بارزانی داواشیکرد گفتوگۆ لەبارەی گۆڕانکاری لە سەرۆكایەتی ھەرێمی كوردستان و پەرلەمانی و حکوومەت بكەن.
دوای پەیامەكەی بارزانی پارتی دیموكراتی كوردستان وەك دەستپێشخەری شاندێكی بۆ گفتوگۆ كردن لەگەڵ لایەنە سیاسییەكان پێكھێنا و گەرێكی دیكەی كۆبوونەوەی لەگەڵ حزبەكان دەستپێكرد، تا ئێستا شاندی پارتی لەگەڵ زۆربەی لایەنكان كۆبووەتەوە و بڕیارە رۆژی دووشمەی داھاتوو سەردانی شاری سلێمانی بكات و لەگەڵ شاندی یەكێتی نیشتمانی كوردستان و بزووتنەوەی گۆڕان كۆببێتەوە.