مالكى: بۆ وه‌رگرتنه‌وه‌ى سه‌دام هه‌ڕه‌شه‌ى به‌كارهێنانى هێزم له‌ ئه‌مريكا كرد

به‌ له‌سێداره‌دانى سه‌دام رێگريم له‌ پيلانێكى گه‌وره‌ى كرد بۆ بردنه‌ ده‌ره‌وه‌ى سه‌دام له‌ عێراق.
kurdistan24.net

K24 – هه‌ولێر:

سه‌رۆك وه‌زيرانى پێشووى عێراق، نورى مالكى رايگه‌ياند، به‌ له‌سێداره‌دانى سه‌دام رێگريم له‌ پيلانێكى گه‌وره‌ى كرد بۆ بردنه‌ ده‌ره‌وه‌ى سه‌دام له‌ عێراق.

رۆژى 30ى كانوونى يه‌كه‌م/ ديسه‌مبه‌رى 2016، 10 ساڵ به‌سه‌ر له‌سێداره‌دانى سه‌دام حوسێندا تێپه‌ڕى.

مالكى له‌ وته‌يه‌كدا، ده‌ڵێت: بوشرا خه‌ليل، پارێزه‌رى سه‌دام پێى وتين، كه‌ هه‌وڵێكى بۆ ده‌ركردنى بڕيارێك له‌ ئه‌نجوومه‌نى ئاسايشى نێوده‌وڵه‌تى هه‌يه‌ و تانه‌ له‌ بڕيارى له‌سێداره‌دانى سه‌دام حوسێن ده‌درێت و ده‌بێت بگوازرێته‌وه‌ ده‌ره‌وه‌.

گوتيشى: ئه‌مريكاييه‌كان داوايان كرد، پازده‌ رۆژ بڕيارى له‌سێداره‌دانه‌كه‌ دوابخه‌ين، دواجار وتيان با له‌ يه‌كه‌م رۆژى جه‌ژندا نه‌بێت و منيش سوور بووم له‌سه‌ر ئه‌وه‌ى هه‌ر ده‌بێت له‌ يه‌كه‌م رۆژى جه‌ژندا له‌سێداره‌ بدرێت.

ئه‌م قسه‌يه‌ى مالكى پێچه‌وانه‌ى لێدوانى به‌رپرسانى شيعه‌ى عێراقه‌، كه‌ پێشتر ره‌تيانده‌كرده‌وه‌، رۆژى جه‌ژن سه‌دام له‌ سێداره‌ درابێت و باسيان له‌وه‌ ده‌كرد، ئه‌و كاته‌ى سه‌دام له‌ سێداره‌ دراوه‌ جه‌ژنى قوربان نه‌بووه‌.

هه‌روه‌ها مالكى ئاماژه‌ى بۆ ئه‌وه‌كرد، سه‌رۆكايه‌تى كۆمار واژووى له‌سه‌ر بڕياره‌كه‌ نه‌كردووه‌ و وه‌زيرى داد ره‌تيكردووه‌ته‌وه‌ واژوو بكات و ده‌وروبه‌ره‌كه‌ى ترساون، به‌ڵام ئه‌و سوور بووه‌ له‌سه‌ر جێبه‌جێكردنى بڕياره‌كه‌.

مالكى ئه‌وه‌شى وت: هه‌ڕه‌شه‌م له‌ ئه‌مريكاييه‌كان كرد و وتم ئه‌گه‌ر تا كاتژمێر 3ى به‌ره‌به‌يان سه‌داممان راده‌ست نه‌كه‌نه‌وه‌، ئه‌وا هێز ده‌به‌م و به‌ زه‌برى هێز وه‌رى ده‌گرمه‌وه‌.