فەرماندەیەكی حەشدی شەعبی كوژرا

K24 – گەرمیان

ھەرێم جاف پەیامنێری كوردستان24 لە گەرمیان رایگەیاند: "لە ئاكامی شەڕ و پێكدادانەكانی ھێزەكانی حەشدی شەعبی و چەكدارانی داعش لە ئیمام وەیس كە دەكەوێتە نێوان خانەقین و بەعقوبە فەرماندەی لیوای 110 حەشدی شەعبی و 3 پاسەوانی كوژران".

فەرماندەیەكی ھێزەكانی پێشمەرگە لەناوچەكە نەیویست ناوی بنووسرێت ھەواڵەكەی بۆ كوردستان24 پشتراست كردەوە و گوتی: "لە ئاكامی شەڕ و پێكدادانی سەخت نێوان چەكدارانی حەشدی شەعبی و داعش لە ئیمام وەیس كە چەند كاتژمێرێكی خایەند، لیوا ئەبو كەڕار، فەرماندەی لیوای 110 حەشدی شەعبی و سێ لە پاسەوانەكانی كوژران".

روونیكردەوە: "ئەو فەرماندەیەی حەشدی شەعبی كوردە و دانیشتووی گەڕەكی تۆڵەی شاری خانەقینە".

گوتیشی: "چەند ساتێك دوای شەڕەكە فڕۆكە و ھێلیكۆپتەرەكانی سوپای عێراق بە مەبەستی پاڵپشتی كردن لە ھێزە عێراقییەكان و حەشدی شەعبی ھاتنە ناوچەكە و دواتر تەرمەكانیان بردەوە".

ئەمە لە كاتێكدایە دوای ماوەیەك ئێستا جموجۆڵی چەكدارانی داعش لە زنجیرە چیای حەمرین دەستیپێكردوەتەوە.