فەیسبووك و گوگڵ دژی ترەمپ دەوەستنەوە
K24 - ھەولێر
گوگڵ، ئەپڵ، فەیسبووك، مایكرۆسۆفت و كۆمپانیاكانی دیكەی تەكنۆلۆجیا بە دربڕینی نیگەرانی خۆی، بڕیارەكەی ترەمپ دژی ھاووڵاتیان و كۆچبەرانی 7 وڵاتی بە زۆرینە موسڵمان شەرمەزار دەكەن.
مارك زوكێربێرگ دامەزرێنەری فەیسبووك دژایەتی خۆی بەرامبەر بڕیاری دۆناڵد ترەمپ سەرۆكی وڵاتەكەی بەرامبەر ھاووڵاتیان و كۆچبەرانی عێراق، ئێران، سوریا و چوار وڵاتی دیكەی رۆژھەڵاتی ناڤین دەربڕی.
زوكێربێرگ لە پەیجی خۆی بە دەربڕینی نیگەرانییەكانی دەڵێت: "باوباپیرانم لە ئەڵمانیا، ئوستریا (نەمسا) و پۆلەندا ھاتوون، باوباپیرانی پریسیلیا (ھاوژینەكەی) پەنابەرانی چین و ڤیتنامن. ویلایەتە یەكگرتووكانی ئەمریكا وڵاتی كۆچبەرانە، پێویستە شانازی پێوە بكەین".
ھەر لەبارەی بڕیاری ترەمپ، بەڕێوەبەری جێبەجیكاری ئەپڵ، تیم كۆك رایگەیاند "كاریگەری نەرێنی ئەو بڕیارە بەسەر كارمەندان و كۆمپانیاكەمان بۆ كۆشكی سپی رون كردووەتەوە".
گوگڵ، مایكرۆسۆفت و كۆمپانیاكانی دیكەی تەكنۆلۆجیا ترسی خۆیان بەرامبەر بڕیارەكەی ترەمپ دژی كۆچبەرانی 7 وڵاتی بە زۆرینە موسڵمان پیشاندا.
پیشەسازیی تەكنۆلۆجیای ویلایەتە یەكگرتووەكانی ئەمریكا بە شیوەیەكی بەرچاو پشت بە ئەندازیاران و پسپۆرانی تەكنیكی بیانی دەبەستێت.
سەرۆكی ئەمریكا دۆناڵد ترەمپ رۆژی ھەینی رابردوو 27 كانوونی دووەم بۆ ماوەی سێ مانگ (90 رۆژ) پێدانی ڤیزە و رێگەپێدان بە ھاتنی ھاووڵاتیانی ھەر یەك لە سوریا، ئێران، عێراق، لیبیا، سۆماڵ، سودان و یەمەن ھەڵپەسارد.
ھەروەھا بۆ ماوەی چوار مانگیش (120 رۆژ) وەرگرتنی كۆچبەرانی ئەو 7 وڵاتە ھەڵپەسارد، تا ئەوكاتەی یاسایەكی گشتگیر دەردەچێت.
بەڕێوەبەری جێبەجیكاری گوگڵ، سوندار پیچای بە كارمەندەكانی گوت "بڕیارەكەی ترەمپ كاریگەری بەسەر 187 كارمەندی كۆمپانیایەكەی ھەیە".
مایكرۆسۆفتیش لەمبارەوە دەڵێت "ئاموژگاری و یارمەتی پێشكەشی ئەو كارمەندانەی خۆی دەكات كە بەر بڕیاری ترەمپ دەكەون و پێداگریشی لەسەر كاركردن بە پێی یاساكانی ویلایەتە یەكگرتووەكانی ئەمریكا كرد".
JS