"باشترین وهڵام بۆ راپهڕین و پێشمهرگه و قوربانیدانهكانی گهلی كوردستان سهربهخۆییه"
K24 - ههولێر:
مهسعود بارزانی سهرۆكی ههرێمی كوردستان، به بۆنهی 26همین ساڵیادی راپهڕینی گهلی كورد، پهیامێكی بڵاوكردهوه و رایگهیاند، باشترین وهڵام بۆ راپهڕین و پێشمهرگه و قوربانیدانهكانی گهلی كوردستان، سهربهخۆییه.
بارزانی له پهیامهكهیدا ئاماژه بهوهشدهكات، راپهڕینی گهلی كورد، له ئاداری 1991، ئەزموونێكی بێوێنەی مێژووی گەلی كوردستانە لە یەكڕیزی و سەركەوتندا.
دهقی پهیامهكهی بارزانی، بهبۆنهی 26همین ساڵیادی راپهڕینی گهلی كوردستان:
پەیامی سەرۆكی هەرێمی كوردستان بەبۆنەی بیست و شەش ساڵەی ڕاپەڕینی جەماوەری كوردستان
بەناوی خودای بەخشندە و میهرەبان
بیست وشەش ساڵ بەسەر ڕاپەڕینی خەڵكی كوردستان لەدژی ستەم و زۆرداری و داگیركاریدا تێدەپەڕێت. ئەو ڕاپەڕینەی ئەزموونێكی بێوێنەی مێژووی گەلی كوردستانە لە یەكڕیزی و سەركەوتندا. یەكڕیزیی لایەنە سیاسییەكان و پاڵپشتیی گەل بوو بەهۆی بەدیهاتنی سەركەوتنی ڕاپەڕین كە خۆی لە خۆیدا وەرچەرخانێك لە مێژووی بزووتنەوەی ڕزگاریخوازی كوردستان بوو و ئەو پارلەمان و حكوومەت و هەڵبژاردن و ئازادی لێكەوتەوە.
یەكڕیزی و یەكدەنگی وانەی پڕبەهای ڕاپەڕینی بەهاری 1991ـە هەم بۆ ئێستا و بۆ نەوەكانی ئاییندەیش. ئێستا كە گەلەكەمان لە قۆناغێكی پڕ لە دەرفەت و تەحەدیاتدا دەژیێت، لە پێناو تێپەڕاندنی ئەو قۆناغە زیاتر لە هەر كاتێك پێویستیمان بە هەست بە بەرپرسیارێتی و یەكڕیزی و لەبەرچاوگرتنی بەرژەوەندییە باڵاكانی كوردستانە، بۆ ئەوەی سەركەوتنەكان مسۆگەر ببن و ئەو قۆناغە هەستیارە بە سەركەوتوویی تێبپەڕێنین.
یادی ڕاپەڕین لە كاتێك دەكەینەوە كە پێشمەرگە قارەمانەكانمان سەركەوتنی مەزنیان لەبەرانبەر تیرۆریستانی داعش تۆمار كردووە، گەلی كوردستان قوربانی داوە و تەحەمولی سەختی و قۆناغە دژوارەكانی كردووە، بۆیەشە باشترین وەفا و وەڵام بۆ ڕاپەڕین و پێشمەرگە و قوربانیدانی گەلی كوردستان سەربەخۆیی و ڕزگاریی یەكجارەكیە. بە پێویستی دەزانم ئەوە بە خەڵكی خۆڕاگری كوردستان ڕابگەیێنم كە ئاییندەیەكی گەش و ڕووناك چاوەڕێی وڵاتەكەمان دەكات و ڕاپەڕین و خوێنی پێشمەرگە و قوربانیدانی گەل بەرهەم و ئەنجامی دەبێت.
لە یادی ڕاپەڕیندا هەزاران سڵاو بۆ گیانی پاكی شەهیدە سەربەرزەكانمان و ڕێز و پێزانینم بۆ ئەو تێكۆشەر و قارەمان و هاووڵاتییانە هەیە كە ڕۆڵیان لە ڕاپەڕین و یارمەتیدانی پێشمەرگە و سەرخستنی ڕاپەڕینی خەڵكی كوردستاندا هەبوو.
مسعود بارزانی
5ـی 3ـی 2017