ئەردۆغان ئەم بەڵگەیەی رادەستی پوتین كرد

K24 - ھەولێر

رەجەب تەیب ئەردۆغان سەرۆك كۆماری توركیا لە میانەی كۆبوونەوەی لەگەڵ ڤلادمیر پوتین سەرۆكی روسیا وێنەیەكی یەپەگە و سەربازانی روسیا خستەڕوو و پیشانیدا.

رۆژنامەی حورییەتی توركی لەم بارەوە لە زمانی ئەردۆغان بڵاویكردەوە، "ئەم وێنەیەمان پیشانی پوتیندا و شوێن و كاتەكەشمان بۆی دیاركرد و گووتی لێكۆڵینەوە دەكەین و لەمەودوا پرۆسەكە پەیوەستە بە پوتینەوە".

 ئەردۆغان لە كاتی گەڕانەوە لە كۆبوونەوەی لەگەڵ پوتین لە سۆچی روسیا لەناو فڕۆكە وەڵامی پرسیاری رۆژنامەنووسانی دایەوە و لە زمانی پوتینەوە گووتی "بە ئەرێنی سەیری دەوڵەتی كوردی ناكات و ناوچەی بێ شەڕ لە ئیدلب و پێنج ناوچەی دیكە پێشنیار كردووە. ھیوادارم ئەم پرسە 50% كێشەی سوریا چارەسەر بكات".

ئەردۆغان رۆژی سیشەممەی رابردوو لە شاری سۆچی روسیا لەگەڵ پوتین كۆبووەوە. قەیرانی سوریا و  پەیوەندییەكانی نێوانیان لە بابەتە سەرەكییەكانی كۆبوونەوەكەیان بوو.

پێشتر بڵاوبوونەوەی وێنەی سەربازانی ئەمریكا لە گەڵ شەڕڤانانی یەپەگە و ھێزەكانی سوریای دیموكرات، میدیا و رۆژەڤی سیاسی توركیای بە خۆوە سەرقاڵكردبوو، تا ئەو ئاستەی وەزارەتی دەرەوەی توركیا و فەرماندەیی سوپای ئەم وڵاتە ئەم پرسەیان لەگەڵ ھاوتا ئەمریكاییەكانیان تاوتوێ كرد و ئەردۆغان لەم بارەوە ئاماژەی بەوەدا ئەم پرسە لەگەڵ دۆنالد ترەمپ تاوتوی دەكات.