پارتی دەسەڵاتداری سوید پشتیوانی لە ریفراندۆمی سەربەخۆیی كوردستان دەكات
K24 - ستۆكۆڵم
پارتی سۆشیال دیموکراتی سوید، کە پارتی دەسەڵاتداری ئەو وڵاتەیە پشتیوانی خۆی بۆ ریفراندۆمی سەربەخۆیی کوردستان دەربڕی.
ئاندێش ئۆستربێری، (Anders Österberg)پەرلەمانتاری پارتی سۆسیال دیموکرات و ئەندامی کۆمسیۆنی دەرەوەی پەرلەمانی سوید لە لێدوانێکیدا بۆ کوردستان24 رایگەیاند: "ئێمە پشتیوانی خۆمان بۆ ئەنجامدانی ریفراندۆمی سەربەخۆیی کوردستان دەردەبڕین".
گوتیشی: "ریفراندۆم مافێکی یاسایی گەلی کوردستانە و دەبێت کۆمەڵگەی نێودەوڵەتی رێز لە بۆچوونی گەلی کوردستان بگرێت".
بڕیارە رۆژی 25 ئەم مانگە ریفراندۆم بۆ سەربەخۆیی كوردستان لە ھەرێمی كوردستان و ناوچە كوردستانییەكانی دەرەوەی ئیدارەی ھەرێمی كوردستان بەڕێوەبچێت.