سووتاندن و تاڵانكردنی خانوو و ماڵی كورده‌كانی خورماتوو به‌رده‌وامه
K24 - هه‌ولێر:
ئه‌مرۆ چوارشه‌ممه 18/10/2017 مه‌لا حه‌سه‌ن، ئه‌ندامی ئه‌نجوومه‌نی پارێزگای سه‌ڵاحه‌دین به كوردستان24 راگه‌یاند: "حه‌شدی شه‌عبی به‌رده‌وامن له سوتاندن و ته‌قاندنه‌وه‌ی خانوو و ماڵی كورده‌كانی خورماتوو".
هه‌روه‌ها گووتی: "داوا له خه‌ڵكی كوردستان و كۆمه‌ڵگای نێوده‌وڵه‌تی ده‌كه‌ین به‌هانای ده‌ربه‌ده‌ركراوانی شاره‌كه‌وه بچن و هاوكاریان بكه‌ن".
به‌هۆی رێككه‌وتنی ژماره‌یه‌ك له به‌رپرسانی سه‌ربازی و ئه‌منی لایه‌نێكی سیاسی كوردی، رۆژی 16ـی ئۆكتۆبه‌ر، خوورماتو و كه‌ركووك و ناوچه‌كانی دیكه‌ی پارێزگاكه، ته‌سلیمی حه‌شدی شه‌عبی و هێزه‌كانی عێراق كراو وه‌ك تۆڵه‌كردنه‌وه له‌و كورده خۆبه‌خشانه‌ی كه به‌پێچه‌وانه‌ی بڕیاری ته‌سلیمبوونی ئه‌و به‌رپرسانه كه ده‌یانویست به‌رگریی له كوردستانییه‌ت و كوردبوونی خۆیان بكه‌ن، كه‌وتوونه‌ته به‌ر هه‌ڵمه‌تی حه‌شدی شه‌عبی و حه‌شدی توركمانی و هه‌ڵمه‌تی سووتاندن و تاڵانكردنی موڵك و ماڵه‌كانیان به‌رده‌وامه و به هه‌زاران كه‌سیان ئاواره‌ی ناوچه‌كانی دیكه بوون و له ره‌وشێكی زۆر خراپدا ژیان ده‌گوزه‌رێنن.
هه‌روه‌ها له شاری كه‌ركووكیش هێرشكردنه سه‌ر گه‌ڕه‌كه كوردییه‌كان و پشكنین و ئازاردانی خه‌ڵك و ده‌ركردنیان له ماڵه‌كانی خۆیان به‌چڕی ده‌ستیپێكردووه".