مێسی ته‌واوی كاته‌كانی له‌ گه‌رمه‌ی كلاسیكۆ به‌ پیاسه‌كردن تێپه‌ڕكردووه‌

رۆژنامه‌یه‌كی مه‌دریدی ئامارێكی سه‌یر له‌ باره‌ی مێسی بڵاو ده‌كاته‌وه‌

سه‌رچاوه‌یه‌كی راگه‌یاندنی ئیسپانیا، له‌ توێژینه‌وه‌یه‌كدا ده‌ریخستووه‌ كه‌ لیۆنێل مێسی ئه‌ستێره‌ی بارسێلۆنا زۆرترین كاته‌كانی له‌ كلاسیكۆ به‌پیاسه‌كردن تێپه‌ڕ كردووه‌ و چه‌ندان ئاماری دیكه‌شی خستۆته‌ڕوو.

رۆژنامه‌ی ئاسی ئیسپانیا، له‌ چاپی ئه‌مڕۆ سێشه‌ممه‌، 26 دێسێمبه‌ری 2017، ئاماژه‌ی بۆ ئه‌وه‌ كردووه‌ كه‌ لیۆنێل مێسی 83.1%ـی كاته‌كانی له‌ گه‌رمه‌ی كلاسیكۆ به‌ پیاسه‌كردن و رۆیشتنێكی له‌سه‌رخۆ به‌سه‌ر بردووه‌ و له‌ به‌درێژایی یارییه‌كه‌ش له‌ لایه‌ن كۆڤاسیچی كرواتی چاودێری كراوه‌.

به‌ گوێره‌ی هه‌مان سه‌رچاوه‌، مێسی 10.8%ـی خوله‌كی یاریكردنی به‌ راكردنێكی هێواش تێپه‌ڕكردووه‌، رێژه‌ی راكردنیشی به‌شێوه‌یه‌كی خێرا به‌ 4.95% خوله‌ك خه‌ملێندراوه‌.

رۆژنامه‌ی ئاس ئه‌وه‌شی خستۆته‌ڕوو كه‌ مێسی له‌ كلاسیكۆ له‌ رووبه‌ری 8.03 كیلۆمه‌ته‌ر جوولاوه‌ و یاریكردووه‌، ئه‌مه‌ش مه‌ودایه‌كی كه‌متر به‌ به‌راوردی یاریزانه‌كانی یانه‌كه‌ی و ته‌نانه‌ت یاریزانه‌ یه‌ده‌گه‌كانیش.

سه‌ره‌ڕای هه‌موو ئه‌وانه‌ش، لیۆنێل مێسی له‌ كلاسیكۆی ئیسپانیا سه‌ركردایه‌تی بارسێلۆنای كرد و به‌ 3 گۆڵی بێوه‌ڵام شكستی به‌ ریال مه‌درید هێنا، مێسی له‌ یارییه‌كه‌دا گۆڵێك و ئاسیستێكی كرد.