فراکسیۆنی بزووتنەوەی ئیسلامی رەخنە لە چوونی شاندە حزبییەکان بۆ بەغدا دەگرێت
K24 - ھەولێر
سه‌رۆكی فراكسیۆنی بزووتنه‌وه‌ی ئیسلامی له په‌رله‌مانی كوردستان ره‌خنه له سه‌ردانی شاندی هاوبه‌شی سێ لایه‌نی سیاسیی هه‌رێم بۆ به‌غدا ده‌گرێ و سه‌ردانی شاندی حزبی و تاكلایه‌نی بۆ به‌غدا به ناشه‌رعی و بازردان به‌سه‌ر دامه‌زراوه شه‌رعییه‌كان كوردستان ناوده‌بات. به‌پێویستیشی ده‌زانێت ئه‌نجوومه‌نێكی دانووستان پێكبهێنرێت بۆ دانووستاندن له‌گه‌ڵ حكوومه‌تی عێراق.
ئاری عه‌بدول لەتیف، سه‌رۆكی فراكسیۆنی بزووتنه‌وه‌ی ئیسلامی له په‌رله‌مانی كوردستان بە كوردستان24 گوت: "دانیشتن و گفتوگۆی ناراستەوخۆی ھەندێك حزب و لایەن و چوونی شاندی ھەندێك لایەن كە دەچنە بەغدا بۆ دانیشتن لەگەڵ حكومەتی عێراق ناشەرعیی دەزانین، وا ھەست دەكەین بازدانە بەسەر دامەزراوە شەرعییەكانی ھەرێمی كوردستان".
گوتیشی: "بۆ چارەسەركردنی قەیرانەكان و گفتوگۆكردن لەگەڵ بەغدا، پێویستە ئەنجوومەنێكی باڵای دانوستانكار پێك بھێندرێت، كە گوزارشت لە رای خەڵكی كوردستان بكات و ھەرێمی كوردستان بە یەك پاكێج و یەك گوتار دانوستان لەگەڵ بەغدا بكات".
لە چەند رۆژی رابردوودا شاندێكی حزبی كە پێكھاتبوو لە نوێنەری گۆڕان و كۆمەڵ و ھاوپەیمانی سەردانی بەغدایان كرد و لەگەڵ بەرپرسانی عێراق كۆبوونەوە، ئەمەش لە ھەرێمی كوردستان كاردانەوەی لێكەوتەوە، زۆرینەی خەڵكی كوردستان لەگەڵ ئەوەدان دانوستان لەگەڵ بەغدا لە رێگەی حكومەتی ھەرێمی كوردستان بێت نەك حزبەكان.
ھ.م